Qırımda eñ güzel ezan oquyıcıları belgilendi | ЦРО ДУМК

Вторник

16

июля

10
Мухаррем
1446 | 2024
Утр.3:14
Вос.5:02
Обед.12:54
Пол.16:56
Веч.20:36
Ноч.22:24
Времена намазов
Календарь 2024

Намаз

Qırımda eñ güzel ezan oquyıcıları belgilendi

Опубликовано:

Aqmescitte, Kebir camide ezan oquyıcıları arasında keçirilgen “Ezan sedası” yarışınıñ finalı olıp keçti. Qırımnıñ farqlı regionlarında keçirilgen saylav turlarına 100-den ziyade iştirakçi qatnaştı.

Finalistlerge liyaqatlı jüri azaları qıymet kestiler, jüri terkibine Qırım Müftisiniñ muavinleri Raim Ğafarov ile Remzi Qurtdede, Aqmescit rayonı şarqiy bölgesiniñ baş imamı Bekir Adilov ve Aqmeçit rayonınıñ baş imamı Löman Abduramanov kirdiler.

Qırım Cumhuriyeti ve Sevastopol şeeri Müftisi adından iştirakçilerni Müfti muavini Raim Ğafarov selâmladı.

“Bizim qartlarımız, vatanğa qaytıp, cami qurucaqlarını, torunları ise, ezan oquycaqlarını hayal ete ediler. Bugün ise, şükürler olsun, olarnıñ hayalları kerçekleşti, er yerde camiler qurula, böyle yarışlar ise, yaşlarğa dinini ögrenmege siltem bere”, – dep, qayd etti Raim Ğafarov.

Umumen, finalğa üç yaş kategoriyasına kirgen (6-12 yaş, 12-20 yaş, 20 yaşından büyük) doquz iştirakçi çıqtı. Eñ muvafaqiyetli iştirakçiler qıymetli bahşışlarnen, dicital tehnikasınen, üstünde yarışnıñ timsali olğan meşrebelernen ve taqdirnamelernen taqdirlendiler.

Yarışnıñ iştirakçilerini Müftiligimizniñ diniy tedbirlerni teşkil etüv bölüginiñ rehberi Zenife Ablayeva da hayırladı.

“Yıl-yıldan iştirakçilerniñ sayısı ep arta, ve olar, esasen, yaşlardır. Olar ileride öz camilerinde müezzinler olmaq ve yerli imamlarğa yardım etmek içün ezannı doğru ve dülder oqumağa ögreneler. Bu bizni pek quvandıra”, – dedi Zenife Ablayeva.

Yarış yekünlengen soñ iştirakçiler ve bayram musafirleri içün tatlı sofra donatıldı.

“Ezan sedası” yarışı er yıl Qırım Cumhuriyeti ve Sevastopol şeeri musulmanları diniy idaresiniñ teşebbüsi ve İslâm ilimi, medeniyeti ve tahsiline destek fondunıñ destegi ile ötkerile.

 

Qırım MDİ matbuat hızmeti