Aqmescitte, Qırımtatar akademik muzıkalı drama teatrında Bütünqırım “Merhametlik lâlesi” hayriye aktsiyasınıñ yekünlenüvine bağışlanğan hayriye kontsert olıp keçti. Aktsiya er yıl Qırım Cumhuriyeti ve Sevastopol şeeri musulmanları diniy idaresi ile Qırım musulmanları hayriye fondu tarafından keçirile. 2024 senesi Qırım Cumhuriyetiniñ Başlığı Sergey Aksönovnıñ yardımı ile aktsiya bütün Qırım seviyesinde keçirildi.
Kontsertte seyircilerni Qırım Cumhuriyeti ve Sevastopol şeeri Müftisi hacı Emirali Ablayev selâmladı. O, qayd etti ki, zalda bulunğan er bir insan balalarğa yardım etmek içün öz issesini qoştı.
“Biz epimiz eyi bir maqsat – muhtaclarğa yardım etmek içün birleştik. Bizler belâğa oğrağan er bir kimsege yardım qolunı uzatmağa azırmız. İşbu bütünqırım aktsiyası milletlerara bir aktsiya olıp, bütün halqlarnı bir arada birleştirdi. Qırım Müftiligi ve bütün qırımtatar halqı adından Qırım Cumhuriyetiniñ Başlığı Sergey Aksönovğa ve Qırım Cumhuriyeti Devlet Şurasınıñ Reisi Vladimir Konstantinovğa Vatanımızda barışıqlıqnı saqlağanları içün büyük teşekkürler bildirem”, – dep, qayd etti hacı Emirali Ablayev.
Hayriye kontsertiniñ musafirleri içün meraqlı programma azırlanıldı. Kontsertni Qırımtatar teatrınıñ yırcıları ve oyuncıları, “Art vision” medeniyet ve sport merkezi, “Ateş” qırımtatar oyun ansambli yaraştırdı.
“Rusiye birligi” bölgelerara cemaat teşkilâtınıñ rehberi Yelena Aksönova ve “Qırım bala hospisi”-niñ icra müdiri Anna Rıjkova öz çıqışlarında tedbir teşkilâtçılarına teşekkürler bildirdiler.
Tantanalı kontsertniñ soñunda “Lozovoye mektep-internatınıñ” balaları “Merhametlik lâlesi” aktsiyasınıñ gimnini icra ettiler.
“Merhametlik lâlesi” Bütünqırım hayriye aktsiyası “Balalarnıñ ellerinen ve büyüklerniñ eyi niyetinen” şiarı astında fevral-aprel ayları devamında keçti. Toplanğan bütün paralar ağır hasta balalarnıñ qorantlarına ve Kefe şeerinde bala hospisiniñ qurulmasına berilecek.
Qırım MDİ matbuat hızmeti