Qırım Cumhuriyeti ve Sevastopol şeeri Müftisiniñ muavini Raim Ğafarov Qırım Cumhuriyetiniñ “Aqmescit avtonaqliye tehnikumı” devlet bücet professional tahsil müessisesiniñ talebelerinen körüşti. Körüşüvde Raim Ğafarov bir arada eki mevzunı açıqladı: “İslâm terrorizmge ve ekstremizmge qarşı” ve “İçtimaiy ağlarnıñ menfiy tesiri”.
“İslâm – merhametlik ve barışıqlıq dinidir. Onıñ ekstremizmnen ve terrorizmnen iç bir alâqası yoq”, – dep, qayd etti Raim Ğafarov.
Yaş nesilge içtimaiy ağlarnıñ menfiy tesiri aqqında aytıp, Raim Ğafarov insanlarnen canlı qonuşuvnıñ müimligini ayrıca qayd etti. “Şübesiz, zemaneviy tehnologiyalar vastasınen qonuşuvnıñ müsbet tarafları bar, olar bizge duyğularımıznı köstermeyip qonuşmağa imkân berdi. Amma yollağanımız iç bir smayl kerçek tebessümimizniñ yerini alamaz. Canlı qonuşuv bizge quvanç, keder, baht ve bütün diger duyğularnı is etmege imkân bere. Bular bizni insan yapqan, duyğularımıznı canlandırğan şeylerdir”, – dedi Raim Ğafarov.
Qırım MDİ matbuat hızmeti