Qırım Cumhuriyeti ve Sevastopol şeeri musulmanları Müftisiniñ muavini Raim Ğafarov Curçı rayonınıñ memuriyeti yanındaki milletlerara ve dinlerara munasebetleri boyunca şuranıñ keñiş toplaşuvında iştirak etti. Qırım musulmanlarınıñ diniy yetekçisi hacı Emirali Ablayev adından selâmlav sözünde bulunğan soñ, Raim Ğafarov Qırım Cumhuriyeti Milletlerara munasebetler boyunca devlet komitetiniñ reisi Ayder Tippağa, Curçı rayonı memuriyetiniñ başlığı Yelena Krestyaninovağa, Curçı rayonı din cemiyetleriniñ reisi Vaid Bilâlovğa ve imam Server Yagyayevke Qırım Cumhuriyeti ve Sevastopol şeeri musulmanları diniy idaresinden (Tavriya Müftiyatından) dinlerara munasebetler saasında işbirlikleri sebebinen teşekkürnameler taqdim etti.
Keñiş sürette keçirilgen mezkür toplaşuvda Curçı rayonınıñ baş imamı Kemal Ğafarov, Curçı rayonı memuriyeti reisiniñ birinci muavini Aleksandr Sokolovskiy, Curçı rayonı şurasınıñ reis muavini Yelena Stelmah, Qırım Cumhuriyeti Devlet Şurasınıñ millet vekili Valeriy Hasitoşvili iştirak ettiler.
Toplaşuv esnasında devletniñ milliy siyasetini ayatqa keçirüv, ekstremiz mefküresiniñ ögüni aluv, Curçı rayonındaki diniy obyektlerni uquq tarafından resmiyleştirilüvi boyunca tedbirlerni keçirüv meseleleri muzakere etildi.
Qırım MDİ matbuat hızmeti