Qırım Cumhuriyeti ve Sevastopol şeeri Müfticiniñ muavini Raim Ğafarov 2019-2023 seneleri içün Rusiye Federatsiyasında terrorizm mefküresine qarşı küreş üzre kompleks plannı ayatqa keçirüvge dair iş toplaşuvında iştirak etti. Tedbir Qırım Cumhuriyetiniñ milletlerara munasebetler boyunca devlet komitetinde ötkerildi.
Toplaşuvda Qırım Cumhuriyetiniñ milletlerara munasebetler boyunca devlet komitetiniñ reisi Ayder Tippa, Qırım Cumhuriyeti ve Sevastopol şeeri boyunca Cezalarnı icra etüv federal hızmetiniñ idaresiniñ (FKUU Uİİ ÜFSİN), Qırım Cumhuriyetinde Terrorizmge qarşı apparatnıñ, Qırım Cumhuriyeti İçki siyaset, malümat ve munasebetler nazirliginiñ ve diniy teşkilâtlarnıñ vekilleri iştirak ettiler.
Toplaşuv esnasında diniy teşkilâtlarnıñ vekilleri, cemaat fikiriniñ yetekçileri, ruhiyatçılar iştirakinen terrorizmniñ dehşeti ve içtimaiy tehlikesi aqqında qarşısını almaq içün suhbetlerni, bilgilendirüv ve teşviqat tedbirlerini teşkil etmek ve televideniye, içtimaiy ağlar vastasınen yaymaq içün böyle yayınlarnı azırlamaq meseleleri muzakere etildi.
Tedbirniñ esas maqsadı – ekstremizmniñ ve terrorizmniñ, şu cümleden, gençler arasında ögüni almaq ve olarğa qarşı küreşmek, dinlerara işbirlikni pekitmek içün aktual meselelerni çezmekte birdemlikni teminlemektir.
Qırım MDİ matduat hızmeti