Qırım Cumhuriyeti ve Sevastopol şeeri Müftisiniñ muavini, “Elâl” sertifikatsiya bölüginiñ rehberi Remzi Qurtdede maarifçi, neşirci İsmail Gasprinskiyniñ doğğanınıñ 172 yıllığına bağışlanğan “İsmail Gasprinskiyniñ alemi” edebiy oquvlarında iştirak etti. Tedbir İsmail Gasprinskiy adına qırımtatar cumhuriy kitaphanesiniñ oquv zalında olıp keçti.
Tedbir musafirleri ögünde çıqışta bulunaraq, Remzi Qurtdede er kesni Qırım Müftisi hacı Emirali Ablayev adından selâmladı. O, büyük maarifçimizniñ tek qırımtatarlarnıñ tarihında degil de, umumen Rusiye musulmanlarınıñ ayatında müim yerge saip olğanını qayd etti.
“İsmail Gasprinskiyniñ milletimiz ve, umumen, insaniyetniñ inkişafında issesi pek büyüktir. Biz onıñ fikirlerini unutmayıp, kelecek nesillerge aşılamaq kerekmiz. Bu halqımızda onıñ ğayelerini devam etecek büyük insanlarnıñ peyda olmasına siltem olur”, – dedi Remzi Qurtdede.
Bundan da ğayrı, Remzi Qurtdede İsmail Gasprinskiy ve cümle ölülerniñ ruhlarına dua oqudı.
Qırım MDİ matbuat hızmeti