Qırım Cumhuriyeti ve Sevastopol şeeri musulmanları diniy idaresi (Tavriya Müftiyatı) Aqmescit şeeriniñ memuriyetine er yıllıq “Merhametlik lâlesi” hayriye aktsiyasınıñ keçirilüvinde destek köstergeni içün teşekkür bildirdi. Müftilik adından teşekkürnamelerni Müfti muavini Raim Ğafarov ve “Merhametlik lâlesi” aktsiyasınıñ rehberi, QMDİ diniy tedbirlerni teşkil etüvi bölüginiñ rehberi Zenife Ablayeva taqdim ettiler.
Sözge çıqqan Aqmescit şeer memuriyeti başlığınıñ muavini Yelizaveta Gluşçenko böyle teşebbüslerniñ müimligini qayd etip, musulmanlarnı Ramazan ayınıñ başlanuvı ile hayırladı.
Qırım Müftisiniñ muavini Raim Ğafarov işbu aktsiyağa balalarnı celp etmekniñ müimlini qayd etti.
“Aktsiyada aynı balalarnıñ iştirak etmesi bizler içün pek simvoliktir, dini ve milletine baqmadan, er bir bala tedaviylenüvde muhtac olğan balalarğa destek köstermek içün öz issesini qoşa. Bizim şiarımız da bunı tasdıqlay: “Balalarnıñ ellerinen ve büyüklerniñ eyi niyetinen yapılğan eyilik”, – dedi Raim Ğafarov.
Aktsiyanıñ rehberi Zenife Ablayeva mektep hadimleri ve talebelerge teşekkürler ile muracaat etti. O, ocalarnıñ qoşqan büyük issesini ayrıca qayd etti.
“Sizniñ terbiye işiñiz sayesinde balalar büyük istek ile yardım etmege isteyler ve aktsiyamızğa qoşulalar. Aktsiyamıznıñ timsali olıp, balalarnıñ kiçik ellerinen yapılğan er bir lâle yardımda muhtac olğan insanlar içün bir ümüttir. Memuriyet başlığınıñ muavini, şeer memuriyeti tahsil idaresiniñ rehberi Tatyana Suhinağa ayrı minnetdarlıq bildiremiz, çoq sağ oluñız”, – dedi Zenife Ablayeva.
Tedbir esnasında Qırım Müftisi hacı Emirali Ablayev adından Aqmescit şeer memuriyeti başlığınıñ muavini Tatyana Suhinağa, şeer memuriyetiniñ iç siyaseti idaresiniñ başlığı Tatyana Marininağa, Aqmescit şeer memuriyetiniñ yaşlar, sport ve turizm idaresiniñ başlığı Anatoliy Golubitsağa ve Aqmescitniñ umumtahsil mektepleri kölektivlerine teşekkürnameler berildi.
Qırım MDİ matbuat hızmeti