Qırımtatar medeniy-tarihiy miras müzeyi Qırım Cumhuriyeti Medeniyet nazirliginiñ destegi ile şair Yunus Qandımnıñ 65 yıllığına bağışlanğan hatıra merasimini keçirdi.
Qırım Müftisi hacı Emirali Ablayev adından selâmlav sözlerinen Müfti muavini Remzi Qurtdede çıqışta bulundı. O, yazıcınıñ qırımtatar edebiyatınıñ inkişafına qoşqan büyük issesine urğu yaptı ve dua oqudı.
Tedbirde Qırımtatar medeniy-tarihiy miras müzeyiniñ müdiri Safiye Eminova, müzeyniñ yetekçi usulşınası Şefiqa Abduramanova, filologiya ilimler namzeti, Qırım federal universitetiniñ professorı Viktor Gümenük, şair, terciman, hicviyeci yazıcı, jurnalist ve cemaat erbabı Ablâziz Veliyev, “Yañı dünya” gazetasınıñ baş muarriri Seyran Suleyman, Qırım yazıcıları birleşmesiniñ reisi Valeriy Basırov, filologiya ilimleri namzeti Tair Kirimov, şairniñ ömür arqadaşı Sabriye Qandımova ve qızı Hatice Qandımova iştirak ettiler.
Tedbirniñ soñunda bestekâr Edip Asanov şair ile icadiy dostluğı aqqında hatırlavlarınen paylaştı ve Yunus Qandımnıñ müellifliginde yırlarnı icra etti.
İhtar: Yunus Qandım – şair, yazıcı, terciman, publitsist, edebiyatşınas, Ukrainada nam qazanğan medeniyet erbabı. O, qırımtatar edebiyatı klassikleriniñ yañı nesiline aittir. Onıñ şiirleri orta mektep ve aliy oquv yurtlarınıñ oquv programmalarına kirsetilgen. Yunus Qandım aman-aman yigirmi edebiy, ilmiy-populâr kitaplarnıñ, dersliklerniñ, deslik qullanmalarnıñ ve luğatlarnıñ tertip eticisidir. Türkiyede, Romaniyada ve Mustaqil Devletler Birleşmesine kirgen devletlerde keçirilgen bir çoq konferentsiyalarda, simpoziumlarda iştirak etken edi.
Qırım MDİ matbuat hızmeti