Aqmescitniñ baş imamı, Qırım Müftisiniñ Qırım Cumhuriyeti ve Sevastopol şeerinde Rusiye ÜFSİN-i ile işbirlik boyunca yardımcısı Muhammed İslamov yardımcılarınen beraber Keriçteki №2 umumiy rejimli tüzeltüv koloniyasını ziyaret ettiler.
Oraza bayramı munasebetinen mahkümlerge aşayt maddeleri, meyva ve sebzeler, suv, tatlılıqlar berildi ve 800 insanlıq pilâv pişirildi. Muhammed İslamovnıñ sözlerine köre, dini ve milletine baqmadan, apiste bulunğan er kes pilâvnen sıylandı.
Bundan da ğayrı, qırımtatarlarnıñ Qırımdan sürgün etilmesiniñ 77-nci yıllığı munasebetinen Muhammed İslamov mahkümlernen beraber sürgünlik qurbanlarınınıñ ruhlarına dua oqudı.
“Duadan soñ diniy ahlâq dersini keçirdik. Biz dostane munasebetler, qıyın vaziyetlerde musulmanlarnıñ bir-birine munasebetleri nasıl olmaq kerekligini, – diger apislilerge nisbeten sabırlı ve musamahalı olmaq, dinimizni, tilimizni ögrenmek kerekligini muzakere ettik”, – dedi Muhammed İslamov.
Körüşüv devamında Muhammed İslamov Keriçteki №2 tüzeltüv koloniyasınıñ başlığı Aleksey Böbrikovnen koloniyada namaz odasınıñ açıluvı mevzusını muzakere etti.
“Biz endi bir qaç kere bu mevzunı köterdik, mahkümler ruhiy destek odası ya da sınıf odasında namaznı qılmaq mecburlar. Ümüt etem ki, şu ilâve muzakerelerden soñ şu mesele çezilir”, – dep, ümütini bildirdi Muhammed İslamov.
Bundan da ğayrı, o, Qırım Cumhuriyeti ve Sevastopol şeeri musulmanları diniy idaresi adından Keriçteki №2 tüzeltüv koloniyasınıñ başlığı Aleksey Böbrikovğa tedbirniñ keçirilüvine destek köstergeni içün teşekkür bildirdi.
Qırım MDİ matbuat hızmeti
