Aqmescitte Qırım ve Sevastopol Diniy idaresiniñ “Altın nesil” internet-klubınıñ açıluvı olıp keçti. Klub 10-16 yaşına qadar yigirmiden ziyade gençni topladı.
İnternet-klubınıñ reberleri ocalar Feride Memetova ve Ayşe Adilova balalar içün meraqlı programmanı azırladılar: gençler biri-birinen tanış oldılar, kendisi ve meraqlanğan şeyleri aqqında tarif ettiler. “Faydalı ilim” leyhasınıñ reberi Zeyneb Bairovanıñ sözlerine köre, ay devamında balalar internet-klubınıñ faaliyetinde iştirak ettiler.
“Olar oqutuv videolarını çıqardı, yarışlar, kvest keçtiler. Bugün ise keçirilgen yarışlarnıñ ğalipleri belli oldı. Er bala klub iştirakçisi kartasınıñ saibi oldı”, – dep ayttı Zeyneb Bairova. Tedbirniñ soñunda balalar bouling oynadılar.
Hatırlatamız, “Altın nesil” internet-klubı genç müsulmanlar içün çalışmaqta! Onıñ esas maqsadı 10-16 yaşındaki balalarğa alternativ qonuşuv meydanını qurmaqtır. Mında genç qırımtatar müsulmanı şahsiyetiniñ inkişafı içün yarışlar, oyunlar işlep çıqarıldı. Bundan da ğayrı, programma boyunca iştirakçiler ayda bir kere toplaşıp, milletimizniñ tarihı ve medeniyetini ögrenecekler.
QMDİ MDT hızmeti