Aqmescit rayonınıñ Mirnoye №2 mektebinde “Qaramanlarğa şeref!” rayon yarışı olıp keçti. Yarışta rayonnıñ 28 mektebinden kelgen 417 talebe iştirak etti.
Tedbir teşkilâtçıları – Qırım Cumhuriyeti ve Sevastopol şeeri musulmanları diniy idaresi, Qırım Cumhuriyetiniñ tahsil, ilim ve yaşlar nazirligi, Aqmescit rayon memuriyetiniñ tahsil idaresi ve Mirnoye orta mektebiniñ memuriyetiniñ destegi ile.
Yarışnıñ müellifi ve teşkilâtçısı – tarihçı, cemaat erbabı Reşat Asmanovdır.
Jüri terkibine Qırım Müftisiniñ muavini Ayder İsmailov, Aqmescit rayonı tahsil memuriyetiniñ rehberi Svetlana Dmitrova, “№2 Mirnoye mektebiniñ” yolbaşçısı, MBOU DO “TSDÜT” usulşınası Üsniye Şaripova ve leyhanıñ müellifi Reşat Asmanov kirdiler.
Tedbir Ulu vatan cenkinde Ğalebeniñ 75-yıllığı qayd etilüvi çerçivesinde olıp keçti.
Yarış Ekinci cian cenki, Ulu Vatan cenki ve Qırım qaramanlarınen bağlı dört basamaqtan ve onlayn viktorinadan ibaret oldı.
Böylece, №1 Gvardeyskoye mektebiniñ talebesi Niyara Hayaliyeva, №2 Kölçugino mektebiniñ talebesi Sofiya Çahalova, Partizanskoye mektebinde oquğan Adile Üseinova, Ukrain mektebiniñ talebesi Vladislav Petrov ve Çistenkoye gimnaziya-mektepniñ talebesi Sabina İminova yarışnıñ ğalipleri oldılar.
Onlayn-viktorinanıñ ğalipleri ise, №1 Gvardeyskoye mektebiniñ talebesi Ernest Qurtseitov, Dobroye mektebiniñ talebesi Nikita Parkin ve Alik Günaridi, Kölçugino mektebinde oquğan Alina Kurtseitova ve Sabina Sufyanova, Partizan mektebinden İlya Kulagin ve Adile Üseinova, Çistenkoye gimnaziya mektebiniñ talebesi Sabina İminova oldılır.
Bundan da ğayrı, yüksek bilgi seviyesini Perevalnoye, Urojaynoye, Kubanskoye ve Mirnoye köylerindeki mekteplerniñ talebeleri numayış ettiler.
Ğaliplerge taqdirnameler ve bahşışlar taqdim etildi.
Teşkilâtçı Reşat Asmanov kayd etkenine köre, işbu tedbir em talebeler, em de olarnıñ ocaları ve ana-babaları içün çoq emiyetlidir.
“Kim bilgige saip olmağa istese, tarihnı ögrene. Esas maqsadımız – qırımtatar halqımız öz qaramanlarını bilsin”, – dedi o.
Qırım Müftisiniñ muavini Ayder İsmailov talebelerge yarışta iştirak etkenleri içün teşekkür bildirdi ve Qırım Müftisi hacı Emirali Ablayev adından destek sözlerini ayttı.
“Tarihnı ögrengenimizde, biz qaramanlarımızğa nisbeten ürmet ve sevgi duyıp başlaymız. Göñüllerimizde vatanğa sevgi kibi müsbet asletler peyda ola. Qırım Cümheriyeti ve Sevastopol şeeri musulmanları diniy idaresi yaş nesilniñ öz vatanınıñ qaramanlarını bilmesini ve olarnı nümüne almasını maqsat qoya”, – dedi Ayder İsmailov.
Qırım Müftisi hacı Emirali Ablayevge ve onıñ muavini Ayder İsmailovğa Aqmescit rayonınıñ memuriyetinden işbirlik ve halqara musamahanıñ, maneviyatnıñ terbiyelenmesine qoşqan büyük isseleri ve “Qaramanlarğa şeref!” rayon yarışını teşkil etip keçirgenleri içün teşekkürnameler taqdim etildi.
Ayder İsmailov qayd etti ki, Qırım Müftiligi er daim böyle tedbirlerge öz destegini kösterecek.
Yarış distantsion şekilde keçirildi.
Qırım MDİ matbuat hızmeti
