2020 senesi, iyün 26 künü Aqmescitniñ Beloye-5 qasabasında Qırımtatar bayraq kününe bağışlanğan bayram ötkerildi. Tantanalı merasimde yerli sakinler ve Aqmescitniñ musafirleri toplandı.
Bayram programması çersçivesinde bala fleşmobı olıp keçti, – balalar milliy bayraqlar ile Beloye-5 qasabasınıñ soqaqlarından keçti. Bundan soñ, uzunlığı 5 metr olğan eñ büyük bayraq açıldı, balalar onı bir qaç soqaqtan alıp kettiler. Soñra, caminiñ yanında yerleşken bala meydanında bayram kontserti olıp keçti. “İlim çoqrağı” mektebiniñ talebeleri bayraqqa bağışlanğan yırlar icra etti, şiirler oqudılar. Bekir Adilov ilâhiy icra etti, qasabanıñ esli başlı sakinleri dua oqudı.
Tedbir iştirakçilerini Qırım Müftisiniñ muavini Ayder İsmailov hayırladı. O, qırımtatar milliy bayrağınıñ, milliy nişanımız – tamğanıñ tarihıları aqqında tarif etip, millet simvollarınıñ degerini qayd etti.
“Bizim dinimiz, tarihımız, bayrağımız, tuvğan tilimiz urf-adetlerimiz – ecdatlarımızdan qalğan büyük mirastır ve biz olarnı saqlamaq ve kelecek nesillerge yetkizdirmek kerekmiz. Bugün devletimizde, cumhuriyetimizde, tuvğan topraqlarımızda olıp keçken cereyanlardan çette qalmamaq kerekmiz. Sesimizni eşittirmek – pek müimdir”, – dedi Ayder İsmailov.
Balalar ve musafirler içün tatlı sofra donatıldı, sofranı milliy bayraq şekilindeki lezetli tort yaraştırdı.
Bayram tedbiri “Ramazan” adlı yerli din cemiyeti, qasabanıñ faal sakinleri ve teşebbüsçileri tarafından Qırım Cumhuriyeti ve Sevastopol şeeri musulmanları diniy idaresiniñ destegi ile teşkil etildi.
QMDİ matbuat hızmeti
