Aqmescitniñ Beloye-5 qasabasında ananeviy bayram olaraq Qırımtatar milliy bayraq künü qayd etildi. Qırım musulmanları diniy idaresiniñ destegi ile bayramnı qasabanıñ faalleri ve yerli din cemiyeti teşkil ettiler. Bayram cami azbarında keçirilip, bir qaç nesilni birleştirdi. Balalar milliy bayraqlarnı ellerine alıp, toplu şekilde, bir qaç kervan olıp, qasabanıñ soqaqlarından keçtiler, olarğa büyükler, esli-başlı insanlar da qoşuldı.
Cami yanında bayram iştirakçileri büyük qırımtatar bayrağını açtılar.
“İlim çoqrağı” afta soñu kurslarınıñ talebeleri qırımtatar bayrağına bağışlanğan şiirler oqudılar, vatanperverlik yırlarını ve halq oyunlarını icra ettiler. Tantananıñ soñunda ise, bayramnıñ kiçik iştirakçilerine ve musafirlerge tatlı bahşışlar taqdim etildi.
Qırım MDİ matbuat hızmeti