Aqmescitte, Seit Settar diniy külliyeniñ tahsil binasında qırımlı imamlar içün ihtisas yükseltilüvi kursu olıp keçti. Kursnıñ mevzusı: “İmam faaliyetiniñ psihologik tarafı: resurslarnıñ ğayrıdan tiklenilüvi ve menfiy allarnıñ profilaktikası”.
Kursnıñ teşkilâtçısı – Qırım Cumhuriyeti ve Sevastopol şeeri musulmanları diniy idaresi ve Musulmanlarğa ruhiy destek birleşmesidir (Moskva ş.). Bundan da ğayrı, tedbirde Qırım Cumhuriyeti ve Sevastopol şeeri boyunca ÜFSİN hadimleri de iştirak etti.
Kurs devamında Moskva, Qazan ve Krasnoyarsktan kelgen Musulmanlarğa ruhiy destek birleşmesiniñ azaları resurslar ve özgünlik, din motivli ekstremizmniñ psihologik hususiyetleri aqqında tarif ettiler.
Buña ilâve olaraq, diger ruhiy mevzular da muzakere etildi. Hususan, “Dialog” merkeziniñ (Qazan ş.) mütehassısı Farida Hasanova ekstremistik faaliyeti içün mahküm etilgen insannıñ içtimaiy-ruhiy şekilini tasvir etti, Bütünrusiye musulmanlarğa acele ruhiy yardım bağınıñ koordinatorı Natalya Maryam Bariyeva acele telefon bağında imamlar ve ruhiyatçılarnıñ iş tecribesi ve musulmanlar problemleriniñ bir kompleks şekilinde çezilüvinen paylaştı.
Lektsiyalar ve ameliy işler onlayn ve offlayn şekilinde ötkerildi.
Musulmanlarğa ruhiy destek birleşmesi idaresiniñ reisi, Halqara İslâm ruhiyatı birleşmesiniñ azası Ölga Pavlova Qırım Müftisi hacı Emirali Ablayevge ihtisas yükseltilüvi kursunıñ keçirilmesine yardımı içün teşekkür bildirdi.
“Qırım MDİ imamlarınen artıq bir qaç yıl devamında çalışamız. Olar ruhiy faaliyetke azır olğanını, tez meseleni añlağanlarını ve ğayet faal olğanlarını körmek sevindirici bir aldır. Dersimiz pek semereli keçe. ÜFSİN hadimleriniñ ise, inanğanlarnıñ ruhiyatı aqqında bilgilerge büyük ihtiyacı bar”, – dep, qayd etti Ölga Pavlova.
Bundan da ğayrı, o, Qırım Müftiligine Musulmanlarğa ruhiy destek birleşmesi ve Qırım musulmanları diniy idaresiniñ işbirligi aqqında añlaşma boyunca umumiy leyhalarnıñ faal ömürge keçirmesi içün teşekkür bildirdi.
Qırım MDİ matbuat hızmeti
