Aqmescitte radio alıp barıcıları içün “Nutuq sanatı” treningi ötkerildi. Tedbir teşkilâtçısı – Qırım müsulmanları Diniy idaresiniñ “İrfan” radiosıdır. Trening “Seit-Settar” diniy kompleksiniñ oquv merkezinde olıp keçti. “İrfan” radiosınıñ koordinatorı Anvar Tuşakovnıñ sözlerine köre, treningniñ esas maqsadı – faaliyetini endi başlağan radio alıp barıcılarına başlanğıç basamaqnı köstermek ve bu saada endi çoqtan çalışqanlarnı yañı tendentsiyalarınen tanış etmektir. Diktorlıq ve jurnalistika saasında öz tecribesinen belli olğan televizion alıp barıcı, “Pervıy Krımskiy” telekanalınıñ hadimi Vildan Miluşev paylaştı.
Oquv ceryanını Qırımtatar akademik muzıkalı-drama teatriniñ aktrisası Susanna Barabaş devam etti. O, telâffüzni güzelleştirmek içün, mahsus vazifelerni kösterip, trening iştirakçileri ile birlikte doğru nefes aluv ve ses telleriniñ inkişafı içün nasıl areketler yapmaq kerek olğanını ögretti. “İrfan” radiosınıñ baş diktorı Marlen Osmanov Susanna Barabaşnıñ yardımcısı olaraq çıqış yapıp, öz tecribesinen paylaştı. Qave teneffüsi ve üyle namazından soñ trening iştirakçileri radionıñ koordinatorı Anvar Tuşakov tarafından azırlanğan ameliy vazifelerge keçti. Treningniñ soñunda Qırım Müftisiniñ muavini Esadullah Bairov: “Bu kibi treningni birinci kere keçiremiz ve neticesi güzeldir. Ümüt etemiz ki, bugün alğan bilgileriñizni radioda öz işiñizde qullanıp olursıñız. Bundan da ğayrı, bugünki trening daa çoq ögrenilmegen mevzular daa bar olğanını kösterdi. Demek, derslerni kelecekte de teşkil etecemiz.
Ve unutmamaq kerekmiz ki, malümatnıñ doğru ve hatasız yetkizdirilüvi – Muhammed Peyğamberniñ (s.a.s) sunnetidir”, – dep, iştirakçilerni taqdirledi:
QMDİ matbuat hızmeti
