Rusiye Federatsiyasınıñ Federatsiya Şurasınıñ Federal toplaşuvında, reis muavini İlyas Umahanovnıñ reberliginde, Hac missiyasınıñ toplaşuvı olıp keçti. Tedbirde, 2019 senesi hacılıqnıñ neticeleri çıqarıldı.
Bundan da ğayrı, muşaverede, RF Tış işler Nazirligi, Rosturizm, Rosaviatsiya, Rospotrebnadzornıñ temsilcileri, Rusiye hac-missiyasınıñ terkibine kirgen Hac-operatorlarnıñ reberleri iştirak etti.
Qırım ve Sevastopol şeeri musulmanları Diniy İdaresi, resmiy hac-operatorı işiniñ neticeleri ile, QMDİ Tış alâqalar ve hacılıqnıñ teşkil etilüv bölüginiñ reberi Artur Reşitov çıqışta bulundı.
Rusiye hac missiyasınıñ başı Magomed Gamzayev, 2019 senesi Hacılıqnıñ muvafaqiyetli keçirilüvi ile hayırladı. Vekâletliklerniñ temsilcileri ise, öz nevbetinde, eda etilgen işniñ yüksek seviyesini ve hac-operatorlarnıñ regional idarelernen işbirligini qayd ettiler.
AVN-Tur direktorı Artur Reşitov, Rusiye Hac-missiyasınıñ reberligine, Qırım Müftisi hacı Emirali Ablayev adından selâmlar ayttı ve Qırım musulmanlarını hacılıqqa yollamağa destek köstergeni içün teşekkürler bildirdi.
Hac-operatorlarnıñ temsilcileri, hacılıqnıñ teşkil etilüv seviyesiniñ yükseltilüvi üzerinde çalışmalarını devam etmek azır olğanlarını bildirdi.
QMDİ matbuat hızmeti
