Evel bildirgenimiz kibi, bu sene Saudiye Arabistanı Qırım Müftiligine hacılıq mevsimi içün 270 insanlıq kvotanı ayırdı.
Hacılıqqa barıp kelmek içün “Standart-plüs” turunıñ fiyatı 5 900 $ teşkil ete. Ödev resmiy kurs boyunca rubleler ile yapılacaq. Birinci taqım Moskvadan Saudiye Arabistanına iyün 25 künü üçünci devletten tranzit ile yol alacaq.
Turnıñ fiyatına Mekke ve Medinede, Mine ve Arafatta yaşamaq, Saudiye Arabistanı boyunca yolculıq, taqım rehberiniñ bulunması, viza, hacınıñ taqımı – torba, namazlıq, ayaqap torbası, 5 l “Zem-zem” suvu kire.
2022 hacılıq mevsiminde Saudiye Arabistanı nevbetteki şartlarnı belgiledi:
– ancaq 10 yılğa berilgen biometrik çetel pasportlarınıñ yañı şekili qabul etile;
– açıq ve qapalı yerlerde maskalarnıñ qullanıluvı mecburiydir;
– yaş sıñırlavı – 65 yaşqa qadar (1957 senesi, iyün 30 kününden evel olmalı);
– aşılama aqqında sertifikat olmalı;
– Saudiye Arabistanına kirmeden 72 saat evel yapılğan PTSR-testniñ menfiy şekili olması – mecburiydir.
Hacılıqqa barmağa istegenler tafsilâtlı malümatnı almaq içün nevbetteki telefon nomeralarına muracaat etmeli: +7 925 715 84 85; +7 978 09 08 202; 8 800 551 31 30.
Hatırlatamız, Qırım Cumhuriyeti ve Sevastopol şeeri musulmanları diniy idaresiniñ resmiy hacılıq agenti – “AVN TUR” teşkilâtıdır.
Qırım MDİ matbuat hızmeti