Qırım Cumhuriyeti ve Sevastopol şeeri Müftisiniñ muavini Ayder İsmailov Sovetler Birliginiñ qaramanı Abdul Teyfuq Amitoviç adına kubogı içün Ocalar künü munasebetinen ocalar arasında cumhuriyet yarışınıñ tantanalı açılışında iştirak etti. Tedbir Qurman qasabasında keçirildi. Sport yarışınıñ iştirakçileri ögünde sözge çıqqan Ayder İsmailov olarnı Qırım Müftisi hacı Emirali Ablayev adından selâmlap, zenaat bayramları ile hayırladı. “İslâmda, tahsil degende, terbiye, istidatlarnı inkişaf ettirüv, bilgi, ürmet ve ahlâq ögretmek közde tutula. İslâm bilgi ve tahsilni aqıl ve yürekni aydınlatuv işi olaraq qabul ete ve buña büyük emiyet bere. Caillikke, qaranlıqqa soñ bermek – dinimizniñ ğayesidir. Bu ise, ürmetli ocalar, tek siziñ ğayretiñiz, emegiñiz ve sabırıñız ile mümkündir”, – qayd etti Ayder İsmailov.
Yarışta Qurman, Aqmescit, Saq, Or Qapı, Canköy, Bağçasaray, Qarasuvbazar rayonlarındaki ve Kezlev şeerindeki umumtahsil mektep ocalarından teşkil olunğan sekiz taqım iştirak etti.
Tantanalı açılış tedbirine qoşulğan musafirler arasında Qurman rayonı memuriyetiniñ reisi muavini Ella Bastrıkina, Qurman rayonı memuriyetiniñ tahsil idaresi reisi Yelena Movçan, “Qırım cumhuriyet futbol federatsiyası” cumhuriyet cemaat teşkilâtınıñ yarışlar keçirüv komitetiniñ yolbaşçısı Andrey Priymak, mezkür yarışnıñ teşebbüsçisi, cemaat erbabı Reşat Asmanov,; Qurman rayonınıñ baş imamı Suleyman Samedinov bulundılar.
Qurman rayonınıñ Voshod köyündeki “Skazka” (“Masal”) bala bağçasından kelgen balaçıqlar futbol qalesine ilk top tepip, yarışnı başlattılar.
Saq rayonınıñ ocalar taqımı yarışnıñ ğalibi oldı. Ekinci yerni Bağçasaray rayonından kelgen taqım, üçünci yerni ise, kezlevli ocalar aldılar. Qurman rayonınıñ taqımı zorlu yarıştan keçip, şanlı dörtünci yerge nail oldı.
QMDİ matbuat hızmeti