Rusiye İslâm institutında İslâm fenleri ve arap tili boyunca Bütünrusiye olimpiadası olıp keçti. Yarışta Tatarstan, Başqırtıstan, Dağıstan, Çeçenistan, İnguşetiya, Kabardino-Balkariya, Mordoviya, Karaçayevo-Çerkessiya, Moskva, Nijniy Novgorod ve diger yerlerden kelgen studentler iştirak etti. Umumen, Olimpiadağa 20 oquv yurtı qoşuldı. Qırımnı yarışta Qırım MDİ Azov (Qalay) medresesiniñ talebesi Osman Osmanov temsil etti. Rİİ rektorı Rafik Muhametşinniñ sözlerine köre, bu sene Olimpiada onuncı kere ötkerilmekte. Kelecek sene ise magistrler içün yañı namzetlikniñ kirsetilmesi planlaştırıla.
“Olimpiada bizler içün bilgi seviyemizni ölçemek ve ilerideki adımlarımıznı tüşünmek içün güzel usuldır. Studentler ise Olimpiadada öz bilgi derecesini yükselte bileler”, – dep qayd etti Rİİ rektorı Rafik Muhametşin.
QMDİ MDT hızmeti