Qırım Müftisiniñ muavini Raim Ğafarov Aqmescitte “Beslan balaları” adlı yaşlar aktsiyasında iştirak etti. Aktsiya beş yıl devamında ötkerile. Onı tibbiyet akademiyasınıñ talebeleri keçirmege teklif etti. Er yıl tedbirge diger kölleclerde ve Qırım Federal universitetinde oquğan talebelerniñ sayısı ep arta.
“İnsaniyetni terrorcılıqqa alıp barğan zulumdan qurtarmaqnıñ yolu – ancaq maneviyattadır, nesillerniñ ahlâqiy ve medeniy ceetten terbiyelenüvindedir. Biri-birini añlap, ürmet etmekten ibarettir”, – dedi, toplanğanlarğa muracaat eterek, Raim Ğafarov.
“Bugün biz sizlernen onlarca, yüzlerce, biñlerce qabaatsız insannıñ ömürini alğan terroristik aktlarnıñ qurbanlarını añmaq içün toplandıq. Eñ dehşetlisi şu ki, kimerde teraktlar balalarğa qarşı yapıla, bu cinayetler neticesinde balalar öldürile. Qırım Müftisi hacı Emirali Ablayev, Qırım Cumhuriyeti ve Sevastopol şeeri musulmanları diniy idaresi ve Qırım musulmanları adından terrorizmnen küreşte birdemlikni bildirmege isteyim. Böyle facialar olmaması içün qolumızdan kelgenini yapmalımız”.
Bundan da ğayrı, Raim Ğafarov hatırlatqanına köre, sentâbr 4 künü bütün Qırım camilerinde Beslan faciası ve terroristik aktlar qurbanlarınıñ hatırasına dualar oqulacaq.
Aktsiyanıñ soñunda talebeler avağa beyaz ava toplarını yiberdiler.
QMDİ matbuat hızmeti
