Qırım Müftisiniñ muavini Ayder İsmailov Moskva-Aqmescit videokopüri şekilinde keçirilgen “Çoqmilletli Rusiyede musulmanlar” mevzulı matbuat konferentsiyasında iştirak etti.
Müfti muavini Qırım Cumhuriyetinde milletlerara ve dinlerara munasebetlerde istiqrarnıñ olmasını ayrıca qayd etti.
“2014 senesi Qırım ve qırımlılar içün siyasiy, medeniy ve ideologik ceetten kritik devirde Qırımnıñ diniy liderleriniñ yapıcı pozitsiyası sayesinde bölgemizde, tıştan kelgen provokatsiyalarğa baqmadan, barışıqlıq ve tınçlıqnı saqlap oldıq”, – dedi Ayder İsmailov.
Onıñ bildirgenine köre, fevral 23 künü Qırımda milletniñ güzel kelecegi içün yaşap çalışqan, yarımadamızdaki halqlarnı güzellikte gülizarnen qıyaslağan ilk saylanğan Qırım Müftisi, Noman Çelebicihannıñ hatıra künü keçirile. O zaman pek ağır ve qıyın siyasiy ceryanlar yüz bergen edi, bu – 17 senesiniñ soñu – 18 senesiniñ başı, inqilâp ve saire. O, diger halqlarnıñ cemaat faalleri ile beraber anarhist matroslar tarafından öldürilgen edi. Ayder İsmailov Qırım ve Herson vilâyetiniñ sıñırında aydutlar taqımına canavarca öldürilgen Noman Çelebicihan adınıñ berilmesini aziz degerlerimizge ters kelgen yuir areket olaraq adlandırdı.
“Nasıldır aydutlar taqımına sadece qırımtatarlarnıñ degil, Qırımnıñ ulu oğlu Noman Çelebicihannıñ adını berip, olar İslâm dinine, qırımtatar halqınıñ şanına leke ketirmek, Qırım musulmanlarınıñ ananeviy diniy qurumını lekelemek tırıştılar, çünki Çelebicihan Qırım Müftisi edi. Yazıq ki, biz böyle siyasiy oyunlarğa rastkelemiz. Men böyle insanlarnı siyasetniñ qurbanları diye adlandıram, çünki bu – kör-körane yan taraflı olmaqtır, insanlar özlerini musulmanlar ve qırımtatarlar olaraq sayıp, öz halqına ziyan bereler”, – dedi Ayder İsmailov.
Moskva-Aqmescit videokopür şekilinde keçirilgen matbuat konferentsiyasında Rusiye musulmanları diniy birliginiñ başlığı, OP RF azası Albir Krganov, RF Prezidenti yanında çalışqan Vatandaşlıq cemiyetiniñ inkişafı ve insan aqları şurasınıñ azası Aleksandr Brod, RF Prezidenti yanında çalışqan Milletlerara munasebetler boyunca şuranıñ azası Margarita Lânge ve RANHiGS Devlet hızmeti ve idaresi institutınıñ devlet ile dinler munasebetleri kafedrasınıñ professorı Vilyam Şmidt iştirak ettiler.
QMDİ matbuat hızmeti
