Qırım müftisiniñ muavini Ayder İsmailov “Üsein Bodaninskiy adına VII ilmiy oquvlar” ilmiy konferentsiyasında iştirak etti. Tedbir Bağçasaray müzeyiniñ 100-yıllığı ve Üsein Bodaninskiyniñ 140-yıllığına bağışlandı. Konferentsiya Bağçasarayda Gasprinskiyniñ hatıra müzeyinde olıp keçti.
Ayder İsmailov Qırım Müftisi adından konferentsiya iştirakçilerini selâmlap, olarğa muvafaqiyetler tiledi. “Bütün iştirakçilerge teşekkürler bildirem, olarnıñ büyük işi sayesinde tarihımız ve medeniyetimizniñ yañı, meraqlı saifeleri açıldı. O vaqıtları çalışqan din adamları, intelligentsiya, iş adamları ve qırımtatar medeniyetiniñ ilerilemesine isse qoşqan diger insanlarnıñ faaliyeti belli olacaq”, – dep ayttı Ayder İsmailov. O qayd etti ki, Üsein Bodaninskiy, Osman Aqçoqraqlı, Amet Özenbaşlı, Asan Sabri-Ayvazov kibi bir sıra alimler, arheologlar, yazıcılar, tilşinaslar, jurnalistler, ocalar öz vaqıtında qırımtatar halqı içün çoq şeyler yaptılar. “Hususan, noyabr 26 künü 2017 senesi (yañı taqvim boyunca dekabr 9 künü) qırımtatar halqınıñ birinci Qurultayında qız oquv yurtu içün ocalarnı azırlaycaq mektep, Mengli Geray adına islâm institutı, Bağçasaraynıñ Hanlar sarayında müzeyniñ teşkil olunması aqqında qarar alındı. Aynı onıñ 100-yıllığını biz bugün qayd etemiz. Ümüt etem ki, biz bugün Qırım sakinleri ve bütün insaniyetlikniñ güzel adetini devam eterik”, – dep yekünledi Ayder İsmailov.
Ayder İsmailov konferentsiya iştirakçilerine teşekkürlerini bildirip, işlerinde muvafaqiyetler tiledi.
Konferentsiya çerçivesinde Üsein Bodanskiyniñ asabalığı, Bağçasaray müzeyiniñ faaliyetçileri, medeniyeti ve tarihına bağışlanğan maruzalar oquldı.
QMDİ MDT matbuat hızmeti
