Moskvada Federatsiya Şurası reisiniñ muavini, Rusiye Federatsiyasınıñ akimiyeti yanında çalışqan Diniy birleşmeler meseleleri boyunca komissiyanıñ hacılıq işleri boyunca vekâletli temsilcisi İlyas Umahanovnıñ yolbaşçılığında Rusiye hacılıq missiyasınıñ muşaveresi olıp keçti. Toplaşuvda 2022 senesi hacılıqnı teşkil etüv meselesi muzakere etildi.
Muşaverede Qırım Cumhuriyeti ve Sevastopol şeeri musulmanları diniy idaresini (Tavriya Müftiyatı) Tış alâqalar ve hacılıqnı teşkil etüv bölüginiñ rehberi Artur Reşitov temsil etti.
Neticede, Qırım Müftiligine 270 kişilik kvota ayırıldı.
2022 senesi hacılıq mevsimi içün Saudiye Arabistanı nevbetteki şartlarnı belgiledi:
– biometrik çetel pasportlarınıñ tek yañı (on yıllıq) şekili qabul etile;
– qapalı ve açıq yerlerde maskalarnıñ qullanıluvı şarttır;
– yaş sıñırı – 65 yaştır (doğuv tarihı – 1957 senesi, iyün 30-dan erte olmamalı);
– aşılama sertifikatı şarttır;
– Saudiye Arabistanına kirmeden 72 saat evel yapılğan menfiy PTSR-test olmalı.
Qırımdan birinci taqımlar 2022 senesi, iyün 20-de yolğa çıqacaq, vatanğa ise, olar iyül 20-de qaytacaq.
Qırım musulmanları diniy idaresiniñ resmiy hacılıq agenti – “AVN TUR” şirketi.
Hacılıqqa barmağa istegen vatandaşlarımız 2022 senesi, mayıs 15-ke qadar arizalarını yazmalı. Arizanı Aqmescit şeeri, Çehova soq., 20 adresi boyunca teslim etmek mümkün. Malümat içün telefon: +7 978 090-82-02.
Qırım MDİ matbuat hızmeti