Qırım Müftisi hacı Emirali Ablayev Bulğar İslâm akademiyasınıñ (Tatarstan Cűmhuriyeti, Kazan ş.) temsilcileri ile körüşti. Olar Qırımnı, aliy İslâm oquv yurtunı taqdim etmek içün ziyaret ettiler.
Bulğar İslâm akademiyasınıñ KMV ile bağ bölüginiñ reberi Almaz Ahmetzânovnıñ sözlerine köre, ziyaretniñ esas maqsadı – Qırım müsulmanlarını oquvğa davet etmektir.
“Biz Qırımğa Bulğar İslâm akademiyasını taqdim etmek, oquv ceryanı, ocalar, studentlerniñ yaşayışı aqqında ikâye etmek ve imamlarnı magistratura ve doktoranturağa, em de ihtisasnıñ yükseltüvini keçmege davet etmek içün keldik”, – dep ayttı Almaz Ahmetzânov.
Magistr (3 yıl) ya da doktorantlıq (2 yıl) kursını yekünlegen Bulğar akademiyasınıñ mezunları medrese ocaları arasında em de aliy İslâm oquv yurtlarında ocalıq yapmağa aqqını qazanalar.
Qırım Müftisi, Bulğar akademiyasında eñ küçlü ve istidatlı studentler oqumaq kerekligini qayd etti.
“Biz diniy-intellektul elita, küçlü ocalar taqımını terbiye etmek kerekmiz. Bu ise Qırımda çoqtan arz etkenimiz İslâm tasiliniñ temelini qoyacaq”, – dep ayttı Qırım Müftisi.
Bulğar akademiyasında İslâm tasilini almağa ya da ihtisasını yükseltmege istegenler yaşav ve aş-suv ile.bedava temin etilecek. Bundan da ğayrı, qoşma masraflarnı qapatmaq içün mahsus stipendiya berilecek. Dersler rus ve arap tilinde keçirilecek, programma lâdiniy ve İslâm ilimlerini qaplap ala. Til seviyesini yükseltmege istegenler ise yazda arap tili kurslarından keçe bilecekler. Bulğar akademiyasınıñ ocalar taqımı Moskva, Sankt-Peterburg, Kazan, Dağıstan Cűmhuriyeti, Yürdün, Suriye, Mısır, Marokko, Malayziyadan kelgen mütehassıslardan ibaret.
Bundan da ğayrı, tehnikiy imkânlar sayesinde, akademiyada onlayn şekilinde oqumaq mümkün.
Al-azırda 2018-2019 oquv yılında oquycaq abituriyentler qabul etile.
Akademiyada oqumaq aq qazanmaq içün, test ve kiriş imtianlarından keçmek lâzim.
QMDİ MDT hızmeti
