Qırım musulmanları diniy idaresi radikalizm ve ekstremizmge qarşı profilaktik işini alıp bara. Bu aqta Qırım Müftisiniñ muavini Ayder İsmailov Rusiye musulmanları diniy birligi ve Rusiyeniñ diniy aqlarnı qorçalav assotsiyatsiyası azırlağanları “Rusiyede musulmanlarnıñ aqlarına riayet meseleleri” maruzasınıñ muzakeresi esnasında Aqmescit-Moskva videokopüri şekilinde keçirilgen matbuat konferentsiyasında tarif etti.
Ayder İsmailov terrorizm, ekstremizm ve İslâm aralarında bir bağnıñ qurulması yersiz olğanı aqqında aytqan spikerlerge teşekkürler bildirdi. O, qayd etti ki, er bir dinniñ radikal şekilde añlavınıñ sebebi – ilk evelâ Quran ve Sunnetniñ yañlış añlavından kelmekte.
“Bu insanlar ifrat ve tefritke kireler ve anda (fırqalarğa – muar.) esasen diniy bilgileri zayıf olğan yaşlarnı celp eteler, böyleje, devlet ya da bölgesindeki vaziyetni kerginleştirmege tırışalar. Qırımda olğan bütün marginal aqımlarve Rusiyede de bar, ve olar, esasen, tıştan idare etile. Ştab-kvartiralar, idareleri, maliyesi, ideologik destek, hususan olaraq, Qırımdan ve, umumen, Rusiyeden tıştadır. Umuman, bu arap devletleridir”, – dedi Ayder İsmailov.
Bundan da ğayrı, o, qayd etti ki, al-ı azırda Qırımda Rusiye Federatsiyasında yasaq etilgen “Hizbu’t-tahrir’ul-islâmiy” fırqasında faaliyet köstermek qabaatınen tutuqlanğanlar meselesi keskin turmaqta. Onıñ sözlerine köre, şu mesele halqara meydanlarda, hususan, ÖBSE teşkilâtınıñ toplaşuvlarında baas mevzusı ola.
“Qırımda sanki bar olğan böyle problematikanıñ halqara cemiyetine yönlendirilmesi, ki, bu – musulmanlarğa basqı, olarnıñ aqlarını bozuv v.s. – asılında temelsizdir. Bu ananeviy İslâm, İslâmnıñ ananeviy añlavı degildir, onıñ içün Qırımda aq bozuluvı mevcut degil”, – diye, qayd etti Ayder İsmailov ve yıqıcı diniy gruppalarnıñ ideologları propaganda maqsadınen musulmanlıq ve qırımtatarlıqnı ögge sürip, bu mñlamlar arqasında gizleneler.
“Künümizde Qırımda 400-ge yaqın cami faaliyette, medreseler, hafızlar oquvı, İslâm temelleri kursları çalışa. Diniy ihtiyaclarnı yerine ketirmek içün kerekli şarait, lâzim kelgen infrastruktura bar. Progress mevcuttır, ve, onı körmek mümkün”, – dedi müfti muavini.
Moskva-Aqmescit videokopür şekilinde keçirilgen matbuat konferentsiyasında Rusiye musulmanları diniy birliginiñ başlığı, OP RF azası Albir Krganov, RF Prezidenti yanında çalışqan Vatandaşlıq cemiyetiniñ inkişafı ve insan aqları şurasınıñ azası Aleksandr Brod, RF Prezidenti yanında çalışqan Milletlerara munasebetler boyunca şuranıñ azası Margarita Lânge ve RANHiGS Devlet hızmeti ve idaresi institutınıñ devlet ile dinler munasebetleri kafedrasınıñ professorı Vilyam Şmidt iştirak ettiler.
QMDİ matbuat hızmeti