Haberler
Aqmescitteki Kalga-sultan kompleksiniñ yerinde sensatsion tapılma (FOTO)
Опубликовано:
Aqmescitteki Vorovskogo soqağında Neapol Skifskiy eteginde arheologlar qadimiy müendislik kommunikatsiyalarnı taptılar. Alimlerniñ fikirince, bu handan soñ akimiyette ekinci dereceni alğan Kalga-sultan sarayınıñ qalımtılarıdır. Qazılıp çıqılğan topraq damartalarınıñ birisinde keramik suv ağı borusı tapıldı. Alimler boru bu yerde saray yerleşkeni zamanına ait olğanında eminler. Olarnıñ fikirince, o hanlarnıñ aşhanesi ya da şimdi de çalışqan qaya tübündeki çeşmege aittir. Qırım müendislik ve pedagogika universitetiniñ tarih kafedrasınıñ müdiri Emil Seydaliyevniñ sözlerine köre, işler eki kün evel başlandı, amma artıq büyük neticeler bar. "Biz eki kün devamında çalışamız, amma artıq medeniy qatnıñ tapılmasınen maqtana bilemiz. Qurucılıq keramikasınıñ parçaları da bar: kiramet, boru, ev eşyaları, savutlarnıñ qısımlarını taptıq. Hanlıq zamanına ait aqça da tapıldı", — dep ayttı Emil Seydaliyev. Qırım Müftisiniñ muavini Ayder İsmailov qayd etti ki, Qırım Müftiligi 10 yıl devamında bu yerde arheologik işlerniñ keçirilmesi içün şefaat etip, topraqnıñ medeniy-tarihiy miras olaraq saqlanıp qalması içün küreşken edi, amma ricalarnı bir kimse eşitmedi. Tek 2014 senesinden soñ kerçek adımlar atıldı. "2000 ss. bizge bu topraqta Cuma caminiñ qurulmasını teklif etken ediler, amma mında tarihiy qalımtı olğanı içün Müftiylik teklifni red etip, başqa topraq damartasını aldı. Mında kompleks, Mengli Geray zamanında qurulğan cami bar edi. Ebet, biz bu topraqnı balansımızğa almağa isteymiz, çünki mında ibadet merkezi yerleşken edi. Bu qırımtatarlar ve diger milletlerniñ mirasıdır. Bu Qırım, asılında bütün Rusiyeniñ qıymetli tarihiy merkezidir", — dep qayd etti Ayder İsmailov. Bundan da ğayrı, o, Ruslan Balbekke arheologik işlerni o qadar faal yapmağa imkânı içün teşekkürlerini bildirdi. Devlet Dumasınıñ mebüsi Ruslan Baalbek ise qayd etti ki, bugünki künden başlap, topraqnı qorumaq içün bütün kerekli vesiqalar azırlanacaq. Onıñ sözlerine köre, esas iş merkez medeniy miras obyektlerniñ saqlanılması cedveline kirsetilgen soñ başlanacaq. Büyük tapıluvnı Kırım arheologiya institutnıñ direktorı Vadim Maykov da tafsir eti. "Qat pek qarırşıq, amma anda endi qıymetli şeyler tapıla. Olar XVII- XVIII asırnıñ başına aittir, yani saray daa turğanı vaqıtına. Onıñ içün biz merkezni cedvelge qoyacamız. Bunıñ yolu zaten belli. Qazma işlerniñ neticelerini medeniy miras Devlet Komitetine taqdim etecemiz", — dep ayttı Maykov. Kalga- Qırım hanlığında handan son akimiyette ekiminci insandır. Qırım MDİ MDT matbuat hızmeti [gallery link="file" columns="4" size="medium" ids="10026,10028,10022,10016,10014,10020,10012,10024,10030,10032,10034,10036"]
Qırımda balalar içün islâm boyunca yañı “Yañı baar” metodik qullanma neşir etildi (FOTO)
Опубликовано:
Mektepten aldın balalar içün metodik qullanma üzerinde Qırım ve Aqyar musulmanları diniy idaresiniñ "Faydalı ilim" medeniy-maarif leyhasınıñ ocaları çalıştı. Metodik qullanma eki qısımdan ibaret. Birincisi — nazariy — "Yañı baar" leyhasınen tanış ete ve mektepten aldın, başlanğıç mektep talebelerni oqumağa ögretmek içün usullarnı köstere. Mında bu saada çalışqan mütehassıslarnıñ tedqiqatları kösterile. Derslerniñ qaideleri, bundan da ğayrı sınıfnıñ donatmaları tasvir etile. Qullanmanıñ ameliy qısımında talebelerde oquşqa meraq doğurmaq ve keçken malümatlarnı menimsemek, balalarda fikir etüv qabiliyetini inkişaf etmek içün yollar kösterilgen. Bundan da ğayrı, qullanmağa balalarda doğru nefes aluv oyunları boyunca mütehassıslarnıñ tevsiyeleri kirsetilgen. İleride bu bilgiler balalarğa arap elifbesiniñ seslerini doğru telâffuz etmege yardım ete. Qullanmada 30 ders planı bar, olar kuslarnıñ esas yönelişlerini qavrap ala. Bu Rusiyede mektepten aldın balalar içün çıqıqarılğan birinci qullanmadır. Metodik qullanmanı Qırım ve Aqyar musulmanları diniy idaresinde (Aqmescit ş. Kurçatova, 4 soq.) ya da "Terciman" (Aqmescit ş. Sevastopolskaya, 44 soq.) tükânında satın almağa mümkün. MDT Qırım MDİ matbuat hızmeti [gallery link="file" columns="4" size="medium" ids="9902,9900,9898,9896,9894"]
Qırım müendislik ve pedagogika universitetinde diniy inşa yarışınıñ ğaliplerini taqdirlediler (FOTO)
Опубликовано:
Qırım Müftisiniñ muavini Ayder İsmailov Qırım müendislik ve pedagogika universitetinde keçirilgen diniy inşalar yarışınıñ ğaliplerini hayırladı. Yarışta farqlı din ve millet vekilleri iştirak etti. Öz işlerinde iştirakçiler islâm ve umumen diger dinlerge baqışlarını aks ettiler. Yarışnıñ esas maqsadı ise Qırımda farqlı din vekilleri barışıqta yaşağanlarını köstermektir. Ayder İsmailov iştirakçilerni hayırlap, olarnıñ işleri güzel seviyede olğanını qayd etti. Ayder İsmailov Qırım Müftisi hacı Emirali Ablayev adından selâm aytıp, universitet reberligi, yarış teşkilâtçıları ve bütün iştirakçilerge minnetdarlığını bildirdi. "Bu kibi tedbirlerniñ qıymeti şunda ki, olar yaşlarğa islâmnı daa teren ögrenmege, fikirlerini aks etmek ve neticelerni çıqırmağa bir siltemdir. Ümüt etem ki, yarışta iştirak etken studentler yañı bir şeyni ögrendiler ve, belki, ileride dinni mütehassıs olaraq ögrenecekler. Belli ki, böyle mütehassıslarda büyük ihtiyacımız bar", — dep ayttı Ayder İsmailov. O qayd eti ki, eñ esası insan islâmnı teren añlasın, bu asırlar devamında Qırımda şekillegen bir dindir ve onıñ sayesinde yarımadada farqlı din vekilleri barışıq içinde yaşap, inkaf etken ediler. Ğaliplerni belgilemek içün mahsus komissiya teşkil olundı. Onıñ terkibine Aqmescit ve Qırım yeparhiyasınıñ Blagoçinnıy II Aqmescit bölüginiñ protoireyi İoann (Şımona), Qırım musulmanları diniy idaresinden tasil bölüginiñ reberi Ruslan Abdullayev ve Qırım müendislik ve pedagogika universitetiniñ terbiye ve içtimaiy işler reberi Server Celâlov kirdi. Komissiya eñ güzel 20 işni seçip aldı ve olarnıñ arasında 5 iştirakçı ğalip çıqtı. Bundan da ğayrı, yarışnıñ neticesinde 20 işni qavrap alğan toplam neşir etildi. Mında müellifniñ fotoresimi, qısqa tercimeiyalı ve eserleri kirdi. Mukâfatlandıruv merasiminde Rusiye devlet Dumasınıñ mebüsi Ruslan Balbek, QMDİ rektorı Çingiz Yakubov, Akmescit ve Qırım yeparhiyasınıñ missioner bölüginiñ reberi protoiyerey Maksim (Kondakov), "Qırımnıñ çoq funktsiyalı vetanperver merkezi" teşkilâtınıñ icra müdiri Roman Bilık iştirak eti. Tedbir iştirakçileri studentlerge teşekkürlerini bildirip, olarğa inkişaf etmege tilediler. MDT Qırım MDİ matbuat hızmeti [gallery link="file" columns="4" size="medium" ids="9666,9664,9662,9630,9628,9626,9624,9622,9620,9618"]
Qırımda “Hanlar sarayı” müzeyiniñ 100-yıllığı qayd etile (FOTO)
Опубликовано:
Qırımda "Hanlar sarayı" tarihiy-medeniy müzeyiniñ 100-yıllığı qayd etile. Bugün resmiy eyiyetniñ başında tantanalı tedbirlerni Qırım başı Sergey Aksönov ve Qırım Müftisi hacı Emirali Ablayev ziyaret ettiler. Tedbir çerçivesinde müzeyniñ temelcisi ve birinci direktorı Üsein Bodaninskiyge bağışlanğan hatıra tahtası açıldı. Bundan da ğayrı, iştirakçiler büyük Han camisinde ve saraynıñ baş binasındaki cenübiy qısımında keçirilgen tamir işleri ile tanış oldılar. Tanış ziyareti devamında "Bağçasaray tarihiy-medeniy ve mimariy qoruq" müzeyiniñ başı Vadim Martınük şimdi keçirilgen tamir işleriniñ ketişatı ve planlaştırılğan havssızlıq ve yañıdan tamirlev işleri aqqında tarif etti. Onıñ sözlerine köre, bu sene müzey saraynıñ 16 obyekti tehnikiy-iqtisadiy tamirine muhtac olğanını tasdıqladı. Tamir işleriniñ fiyatı 16 mlrd rubleni teşkil etecek. Ekskursiyadan soñ "Bağçasaray müzeyniñ inkişafı aspektleri. Akimiyet ve müzey" mevzusında tögerek masa ötkerildi. Mında Hanlar Sarayı Qırımnıñ canlı tarihı olğanı aqqında söz yürsetildi. Qırım medeniyet naziri Arina Novoselskayanıñ sözlerine köre, 2017 senesi nazirlikniñ teşebbüsi ile cumhuriyetniñ baş müzeyleri tarafından bir sıra sergiler, tögerek masalar ve diger tedbirler keçirildi. Olar "Hanlar sarayı" müzeyiniñ 100-yıllığına bağışlanğandır. 2017 senesniñ dekabrinde ise "Üsein Bodaninskiy adına ilmiy oquvlar" konferentsiyasınıñ keçirilmesi planlaştırıla. Qırım Müftii hacı Emirali Ablayev ise ös nevbetinde tarihnıñ qıymeti ve tarihiy obyektler ve eksponatlarnıñ saqlanılmasınıñ müimligini qayd etti. O Qırım başı Sergey Aksönov ve medeniyet Naziri Alöna Novoselskayağa tamir işlerinde destek köstergenlerine teşekkürlerini bildirdi. "Biz tarihnı saqlamaq ve kelecek nesillerge yetiştirmek kerekmiz",— dep qayd etti Müfti. O hatırlattı ki, Qırımda tamir işleri ve restavratsiyağa muhtac olğan bir çoq tarihiy merkez bar. Malümat. 1917 senesi Oktâbr inqilâbından soñ Hanlar sarayında qırımtatar medeniyeti ve tarihıne bağışlanğan müzey açıldı. 1955 senesinden başlap bu Bağçasaray tarihiy-arheologik müzeyi edi. 1979 senesinden başlap ise tarihiy-mimarcılıq müzeyi oldı. 1915 senesinden başlap Hanlar sarayı cumhuriy miras statusını aldı. MDT Qırım MDİ matbuat hızmeti [gallery link="file" columns="4" size="medium" ids="9828,9826,9824,9822,9820,9818,9816,9785,9783,9778,9776"]
Muşaş köyüniñ camisinde talaqa ötkerildi (FOTO)
Опубликовано:
Qarasuvbazar civarındaki Muşaş köyünde talaqa ötkerildi. Bu işler yerli imam Dilâver Emirüseinovnıñ teşebbüsinen teşkil etildi. Qırım Müftiyatınıñ göñülli faali Seyran Kerimovnıñ aytqanına köre, müsülmanlar camini qışqa azırlamaq içün toplaştılar. "Qış yaqınlaşa, onıñ içün imam cami azbarını suvuqlarğa azırlamağa niyetlendi. Em yerli köy cemaatı, em de çevre köylerniñ sakinleri seslenip, toplaştılar", - dedi Seyran Kerimov. Erkekler azbarnı tertipke ketirdiler, kereksiz qurucılıq malzemelerni,otlarnı çöplükke alıp kettiler. Cami damınıñ bir qısımını kirametnen örttiler. Amma, bütün damnı tamirlemek içün olğan kiramet yeterli degil. "Yardım ete bilecek adamlarnı celp etmege ister edik. Qış kelmezden evel bütün damnı tamirlesek, yahşı olur edi. Şükür, şimdi ava pek suvuq degil. Qırımtatarlar Allah rizası içün toplaşqanları quvandıra", - dedi Seyran Kerimov. Talaqadan soñ, iştirakçiler sofra başına oturıp, pilâv aşadılar. QMDİ MDT matbuat hızmeti [gallery link="file" columns="4" size="medium" ids="9601,9599,9597,9595,9593,9591,9589,9587,9585,9583,9581,9579,9577,9575,9573,9571,9569,9567,9565,9563,9561,9559,9557,9555"]
Qırım Müftisiniñ muavini Ayder İsmailov “Qırımğa pencere” telekopürde iştirak etti
Опубликовано:
Qırım Müftisiniñ muavini Ayder İsmailov Aqmescit-Moskva şeerleri arasında keçirilgen "Qırımğa pencere" adlı telekopürde iştirak etti. Tedbir Rusiye Federatsiyası tış işleri Nazirligi tarafından teşkil olundı. Telekopürniñ baş mevzusı Qırımda milletlerara munasebetler ve içtimaiy-siyasiy vaziyet oldı. Moskvadaki studiyada subette rusiyeli ve çetel jurnalistlerler iştirak etti. Qırımdaki cumhuriy matbuat merkezinde ise Qırım jurnalistleri, deputatlar, cemaat erbapları ve akimiyet vekilleri qoşuldı. Qırım Müftisiniñ muavini Ayder İsmailov çetel jurnalistlerniñ Qırım musulmanlarınıñ vaziyeti aqqında sualine bugün musulmanlarğa diniy merasilerni kütmege iç bir kimse keder etmegenini bildirdi. "Bugün Qırımda 350 cami ve maabit çalışmaqta. Cuma cami qurula, bu ise büyük bir vaqia, çünki 15 yıl devamında Qırım musulmanları Qurban ve Oraza bayram namazlarını keçirmek içün Zenaat birliginiñ sport zalını kirağa almağa mecbur ediler. Biz ise Diniy idare olaraq Cuma caminiñ qurulmasına topraq ayırılmasını 10 yıl devamında talap ettik. Topraq 2014 senesinden evel ayırılğan edi, amma qurucılıq içün ruhset alıp olamadıq, bir sıra makeme keçirdik. Şimdi ise Rusiye Prezidentiniñ destegi ile leyha faal ömürge keçirile", — dep ayttı Ayder İsmailov. Bundan da ğayrı, Müftiy muavini Azov medresesi aqqında tarif etti. Şimdi medresede 60 talebe oquy. İsmailov "Faydalı ilim" leyhasını da qayd etti. "Qırımnıñ er bir köşesinde islâm bilgilerini bergen ocalar çalışa, Qoran oquvı dersleri keçirile. Bu saada iç bir manialar yoq, aksine, destek bar", — dep ayttı Ayder İsmailov. Bundan da ğayrı, Müftiy muavini çetel jurnalirniñ diqqatını diniy idareniñ akimiyet ile işbirligine celp etti. "Biz Qırımda ananeviy diniy birleşmelerine devlet tarafından destek kösterilmesine quvanamız, çünki bu barışıq ve farqlı millet vekilleri arasında güzel munasebetlerniñ temelidir. Bu diniy birleşmeler ise Qırımda asırlarnen kütülgen sunit yolu, hanafit mektebindeki islâm, yehudiylik, hristianlıq ve digerleri. İnsanlar asırlarnen qomşu olaraq yaşadılar, olarnıñ munasebeleri şekillendi, onıñ içün tıştan bir de bir aqıntılar kelgeni zaman ( islâm aqqında söz yürsetecek olsaq), ekstremist sektalar öz ideologiyasını teşviq etse, bu tek bir diniy birleşmege degil de, milletler arasında narazılıqlarğa ketire bile. Bu bizim eñ büyük qasevetimiz ve bu saada devlet bizge bütünley qol tuta. Bundan da ğayrı, Qırımda 20 yıldan ziyade "Barışıq - Allahnıñ ediyesi" adlı din teşkilâtları arasında şura çalışa. Teşkilâtqa bütün diniy idarelerniñ başları kire. Olar akimiyet vekilleri, Qırım başı ile işbirlik yapalar. Biz ögümizde olğan meselerni beraber çezmege tırışamız", — dep qayd etti Qırım Müftisiniñ müvini. Ayder İsmailov Qırım musulmanları içün acılıqnı teşkil etken birleşme aqqında da tarif etti. Onıñ qayd etkenine köre, dört yıl devamında acılarnıñ sayısı bayağı arttı. "Acılıqnıñ teşkil etilüvi saasında biz cumhuriy akimiyet vekilleri ile sıqı çalışamız, olar tarafından destek bar, ümüt etemiz ki, kelecek seneleri daa çoq acılarnı toplamağa imkânımız olur", — dep ayttı Ayder İsmailov. Hatırlatamız, Moskva-Aqmescit telekopüri Rusiye tiş işleri Nazirligi tarafında "Millet" qırımtatar telekanalınıñ teşebbüsi ile teşkil olundı. MDT Qırım MDİ matbuat hızmeti [gallery link="file" columns="4" size="medium" ids="9810,9808,9806,9804,9802,9800,9798"]
Qırımda “Altın nesilni” alğışladılar (FOTO+VIDEO)
Опубликовано:
Aqmescitte islâm bilgileriniñ temelleri esasında "Altın nesil" Bütün Qırım yarışınıñ finalı olıp keçti. Tedbirni Qırım Müftisi hacı Emirali Ablayev açtı. O iştirakçiler ve musafirlerni selâmlap, dinimizniñ ögrenilüvi yolunda er kesge muvafaqiyetler tiledi. Bundan da ğayrı, Müfti balalarğa diniy bilgilerniñ berilmesi çoq müim olğanını qayd etti. "Biz 20 yıl içinde yapıp olamağan işni ocalarımız 3 yıl devamında becerdiler. Olar diniy tasil inkişafında büyük issesini qoştılar ve bugün aman-aman er bir rayonda "Faydalı ilim" leyhasınıñ ocaları çalışmaqta. Allah işlerinde yardımcı olsun, biz ise öz nevbetimizde oqmuşlı "altın nesilimizniñ" terbiyelenmesi içün qollarımızdan kelgenini yapacamız", — dep ayttı Müfti. Bilgi yarışında Qırımda çalışqan islâm kurslarınıñ 10 talebesi iştirak etti. Tedbirde 12-16 yaşındaki balalar iştirak etti. Yarış dört basamaqtan ibaret oldı, iştirakçiler islâm ilimleriniñ 12 saasında ve qırımtatar medeniyetinde öz bilgilerini kösterdiler. Bundan da ğayrı, er bir iştirakçı İslâm tarihı boyunca ayrı bir mevzunı açıqladı. Meskür mevzularnı talebeler bir qaç ay devamında tedqiq etti. Jüri terkibine islâm ilimleri ocaları, ilâhiyatçılar ve qırımtatar tili ocaları kirdi. Olar balalarnıñ bilgilerine yüksek qıymet kestiler. Jüri azası, Azov medresesiniñ müdir muavini Alime Abdulmeinova qayd etti ki, yarış iştirakçileri medrese talebeleriniñ bilgi derecesini numayış ettiler. Birinci yerni Aqmescitniñ Boğurça qasabasında yaşağan Ayşe Velilâyeva qazandı. O quvançını gizlemeyip, birinci sözlerini ocası Leylâ Velilâyevağa bağışladı. Ekinci yerni Canköy rayonınıñ Azov qasabasında yaşağan Zudiye Resulova aldı. Onıñ ocası Gülizar Aşirbaryamova neticelernen pek memnün oldı. O talebesiniñ bilgilerge ıntıluvı ve talapkârlığı aqqında tarif etti. Üçünci yerni ise Aqşeyh rayonından kelgen Amina Emirasanova qazandı. Onıñ ocası ise Naira Menazizova. Bilgi yarışı kerçek bayramğa çevirildi ve daa bir kere balalarğa diniy bilgilerni bermege ne qadar müim olğanını kösterdi. QMPU universitetiniñ terbiye ve içtimaiy işler bölüginiñ müdiri Server Celâlovnıñ qayd etkenine köre, bu balalar bütün yaş nesil içün nümünedir. QMPU rektorı Çingiz Yakubov ise böyle merasimler daa sıq ötkerimesine ümütini bildirdi, universitet ise Müftiylikniñ bu kibi teşebbüslerine qol tutmağa azırdır. Tedbir çerçivesinde islâm ilimleri ocaları metodik çalışmalarını kösterip, diniy mevzusında master-klasslar keçirdiler. Merasimni "Emanet" icadiy balalar studiyasınıñ iştirakçileri yaraştırdılar. Bundan da ğayrı, Qırımnıñ farqlı köşelerinden kelgen balalar öz istidatını kösterdiler. Tedbirniñ soñunda bütün iştirakçiler fahriy yarlıqlar ve qıymetli bahşışlarnı aldılar, ğalipler ise para mukâfatına nail oldılar. İştirakçiler, ocalar, musafirler, ana-babalar biri-birini daa bir kere bayramnen hayırladılar. Bu "Altın nesil" içün nevbetteki basamaq oldı. MDT Qırım MDİ matbuat hızmeti https://www.youtube.com/watch?v=P1m1g9f6f_g [gallery link="file" columns="4" size="medium" ids="9765,9763,9761,9759,9757,9755,9753,9751,9749,9747,9745,9743,9741,9739,9737,9735,9733,9731,9729,9727,9725,9723,9721,9719,9717,9715,9713,9711,9709,9707,9705,9703,9701,9699,9697,9695"]
Gurzuf yalısında XVIII — XIX as. musulman qabristanını ğayrıdan tikleycekler (FOTO)
Опубликовано:
Noyabr 3 künü "Artek" halqara bala merkezinde Qırım ve Aqyar musulmanları dikiy idaresi ve "Artek" HBM arasında merkezniñ territoriyasında yerleşken tarihiy-medeniy mirasnıñ saqlanılması aqqında añlaşma imzalandı. Añlaşmanı Qırım Müftisi hacı Emirali Ablayev ve "Artek" halqara bala merkeziniñ müdiri Aleksey Kasprjak imzaladılar. Tedbirde Rusiye Devlet dumasınıñ deputatı Ruslan Balbek iştirak etti. Vesiqağa binayen, raatlıq merkeziniñ yañı binaları qurulğanı zaman tapılğan mezarlar mahsus topraq damartalarında defin etilecek. Bu topraq damartaları Gurzufnıñ 1899 s. haritasına köre, "Magometan nekropol" kibi qayd etilgendir. "Artek" merkezi ise qabristannıñ abadanlaştırılması üzerinde çalışacaq. Qabristannı qayd etmek içün mında "XVIII — XIX as. Magometan mezarı" yazısı qoyulacaq. Añlaşmağa köre, merkezniñ toprağında yañı mezarlar tapılsa, reberlik QMDİ haber bermeli. Bu mezarlıqlar Rusiye qanunlarına köre, medeniyet ve arheologiya abideleri olaraq cumhuriyet cedvellerine kirsetilecek. Musulman qabristanıñ bir qısmı Gurzuf qasabasınıñ Leningradskaya soqağından tış yerleşkeni içün "XVIII — XIX as. Magometan qabristanı" tahtası "Artek" merkezinden tış yerleşecek. Añlaşma imzalanğan soñ Qırım Müftisi hacı Emirali Ablayev "Artek" merkeziniñ reberligine köstergen añlavı ve suallerni çezmege azır olğanı içün teşekkürlerini bildirdi. Onıñ qayd etkenine köre, añlaşma büyük bir adımdır. Ukraina zamanında bu meseleni 30 yıl devamında çezip olamadılar. "Bir çoq bıl devamında ecdatlarımızıñ kemikleri üstünde evler, farqlı binalar quruldı. "Artek" raatlıq merkezinde qadimiy musulman mezarı tapılğan soñ olar bizge haber ettiler. Arheologlar tedqiqatnı keçirdiler ve neticede biz añlaşmanı imzaladıq. Merkezniñ reberiyetine namuskârlığı, bizim ecdatlarımızğa köstergen ürmeti içün teşekkürlerimizni bildirmege isteymiz. İleride de semereli işbirlik yapacağımızğa ümüt etemiz", — dep ayttı Qırım Müftisi. "Artek" raatlıq merkeziniñ müdiri Aleksey Kasprjak ise öz nevbetinde qabristannıñ abadanlaştırıluvı bu yılnıñ soñuna qadar yapılacağını bildirdi. QMDİ ile mimariy plan yapılğan soñ mezarlıq yerinde islâm qanunlarına köre, diniy cedvel qoyulacaq. O Qırım Müftisine işbirlik içün minnetdarlığını bildirdi. "Biz eyi işlerni güzel niyetnen yapmaq içün yollarnı taptıq. Şimdi tarihiy topraqlarda bulunamız, mında asırlar devamında bir çoq vaqialar yüz berdi, olarğa ürmet köstermek ve ibret alıp ögge ketmek kerekmiz", — dep qoştı Aleksey Kasprjak. Bundan da ğayrı, o bildirdi ki, malümat tahtası tek "Artek" içinde degil de, bütün Gurzuf sakinleri ve musafirleri içün açıq olacaq. Bu tek tarihke munasebetni degil de, Qırımnıñ tarihiy mirasına munasebetni kösterecek. Kasprjaknıñ sözlerine Rusiye devlet Dumasınıñ mebüsi Ruslan Balbek qol tuttı. Onıñ qayd etkenine köre, "XVIII — XIX as. musulman qabristanı" medeniy miras statusını alğan birinci merkez olıp, Qırım Cumhuriyeti milliy miras Cedveline kirsetilecek. Bu iş Qırım Ukraina terkibinde olğanda yapılmadı. "Artek" güzel adetni başlay. Merkezniñ reberligi tek qanun degil de, namus qaidelerini köz ögüne aldı. Olar qırımtatar, musulman adetlerine ürmet kösterip, Qırım müftisi ile işbirlikte meseleni çezip, Añlaşmanı imzaladılar. Bu ise nice yıllar devamında güzel munasebetlerge siltem olacaq, mence, işbirligimiz "Artek"ten tış de olacaq. Bizim iş meydanımız bütün Qırım toprağı ve Qırım akimiyeti bu işte bizge destek köstere", — dep ayttı Ruslan Balbek. Onıñ sözlerine köre, şimdi lagerniñ reberligi Qırım medeniy miras qoruvı Komiteti ile birlikte azırlıq işlerini yapa, qabristan artıq Rusiye qanunlarına köre qorula. Resmiy vesiqağa köre, "Artek" merkeziniñ "Kiparisnıy" lageriniñ korpusları qurulğan yerde qoruv-qurtarıcı arheologik işleri keçirilecek, tapılğan arhelogik tapılmalar saqlanılacaq, şu arada qırımtatar miras nümüneleri mahsus müzeylerge teslim olunacaq. MDT Qırım MDİ matbuat hızmeti [gallery link="file" columns="4" size="medium" ids="9831,9878,9876,9874,9872,9870,9868,9866,9864,9862,9859,9857,9855,9853,9851,9849,9847,9845,9843,9841,9839,9837,9835,9833"]
Aqmescitte “Altın nesilni” saylaycaqlar
Опубликовано:
Noyabrniñ 1-nde Aqmescitte İslâm dinine bağışlanğan "Altın nesil" Bütün Qırım yarışınıñ finalı ötkerilecek. Yarışqa 12 yaşından 16 yaşına qadar 10 iştirakçi qatılacaq. İştirakçiler qırımtatar medeniyeti, İslâm dini ilimleriniñ 12 saasına ait bilgilerni numayış etecekler. Er biri bir qaç ay devamında talil etken İslâm tarihı boyunca saylağan ayrı mevzunı "qorçalaycaq". Çıqışlarnı din ocaları, ilâhiyatçılar, filologlar baqıp, qıymet kesecekler. Tedbirde din ocaları metodik qullanmalarnı taqdim etecekler, din mevzusında master-klass keçirecekler. "Emanet" icadiy studiyası kontsert kösterecek. Er kes davet etile. Tedbir noyabrniñ 1-nde saat 11:00- Aqmescit ş., Üçebnıy soq., 8 QMPU-nde keçirilecek. QMDİ MDT matbuat hızmeti
Qırım Müftiyatına Qırım yarımadası mevzusında qıymetli kapikler ediye etildi (FOTO)
Опубликовано:
Qırım müsülmanları Diniy İdaresine yarımadadaki müsülman yadikârlıqları resim etilgen kümüş kapikleri bahşış etildi. Kapikler üstünde Kebir cami (Aqmescit ş.), Cuma cami (Kezlev ş.), Özbek Han camisi (Eski Qırım ş.), Kiçik Quddus, Qaray Kilsesi, Büyük Cuma caminiñ leyihası (Aqmescit) aks etilgen. Bunıñnen beraber, kollektsiyada belli mütefekkir İsmail Gasprinskiyniñ portreti ile kapik mevcut. Bu leyiha RNKB bankı, Qırım Müftiyatı ve RF DD deputatı Ruslan Balbekniñ işbirligi sayesinde ömürge keçirildi. Er kapikniñ tarihiy spravkası bar. Qırım Müftisi RNKB vekillerine teşekkürler bildirip, kapikler toplumı em maddiy, em maneviy ceetten degerli, dep ayttı, çünki, yarımadada yaşağan çeşit din ve millet vekilleriniñ medeniyetini teşviq ete. QMDİ MDT matbuat hızmeti [gallery link="file" columns="4" size="medium" ids="9606,9608,9614,9612,9610"]
Qırım Müftisi Moskvada Saudiya Arabistanı Qıralınıñ ziyareti munasebitenen ötkerilgen merasimde iştirak etti
Опубликовано:
Qırım Müftisi hacı Emirali Ablayev RF PRezidenti Vladimir Pütinniñ daveti ile Saudiya Arabistanı Qıralı Salman Ben Abdel Aziza Al Saudnıñ ziyareti munasebetinen ötkerilgen mahsus merasimde iştirak etti. Tedbir Büyük Kreml sarayınıñ Aleksandr salanonında keçirildi. Qıral Rusiye Federatsiyasında olğan Diniy İdarelerniñ reberlerinen körüşmek niyetinde. Resmiy körüşüvler çerçivesinde diniy ekstremizmge qarşı tedbirler, Hacılıq kvotalarınıñ arttırıluvı aqqında söz yürütilecektir. Bunıñnen beraber, tasil, terbiye ve çeşit aqıntılarnıñ darqalmasına qarşı yapılacaq areketler muzakere etilecek. QMDİ MDT matbut hızmeti
Tatarstan Qırımda cami qurmağa yardım ete! (FOTO)
Опубликовано:
Oktâbrniñ 16-nda Bağçasaray rayonı Aci-Bulat köyünde qurulayatqan cami içün qurucılıq malzemeleri qabul etildi. Tatarstan Cumhuriyeti 26 pencere ve kiriş qapını hayriye yardımı olaraq Qırımğa yolladı. İleride, daa 80 tonna maden, odun, çeşit börüler ketirilecegi beklenile. Hayriye yardımı Aznakayev münitsipal tasiliniñ başı Marsel Şaydullinniñ desteginen yollanıldı. Bunıñnen beraber, Qırım Müftiyatı ve Bağçasaray rayon reberi Refat Derdarov öz isselerini qoştılar. Yükniñ qabul etüv tedbirinde Müfti muavini Ayder İsmailov iştirak etti. Tedbirniñ başında Ayder oca dua oqudı, caminiñ qurucılığında iştirak etken er keske qaviy iman, eminlik ve sabır tiledi. Ayder İsmailov Qırım Müftiyatı adından Tatarstanlı şeriklerge teşekkürler bildirdi ve cami köy müsülmanlarını birleştirecek, dep ümüt besledi. "Köyde yañı caminiñ inşaat etilmesi - bu, yerli müsülmanlar, din cemiyeti, Müftiyat ve Bağçasaray rayon memuriyetiniñ işbirligi sayesinde oldı. Tatarstanlı dostlarımızğa teşekkürler bildiremiz, Allah qat-qat qaytarsın", - dedi Ayder oca. Tatarstan Cumhuriyetiniñ vekili İlmir Kamaletdinov añlatqanı kibi, qurucılıq malzemelerniñ bir qısımı Bağçasaraydaki 6-ncı mikrorayondaki caminiñ azbarında iftarlar içün bir binanıñ inşaatında qullanacaq. Qayd etmek kerek ki, malzemelerniñ ketirilmesinde Tatarstan Cumhuriyetiniñ "MTZ-YelAZ" ticaret evi iştirak ete. Aci-Bulat köyüniñ din cemiyeti reisi Vladimir Mujdabayev añlatqanı kibi, ileride ibadethaneniñ damı deñiştirilecek ve qubbesi qoyulacaq. "Pencereler qoyulğan soñ, içinde işler yapılacaq. Bütün işlerni Yañı yılğa qadar yekünlemege isteymiz", - dedi Vladimir Mujdabayev. V. Mujdabayev Müftiyat ve Bağçasaray rayonı memuriyetine minnetdarlıq bildirdi. QMDİ MDT matbuat hızmeti [gallery link="file" columns="4" size="medium" ids="9439,9437,9435,9433,9431,9429,9427,9425,9423,9421,9419,9417,9415,9413,9411,9409,9407,9405,9403,9401,9399,9397,9395,9393,9391,9389,9387,9385,9383,9381,9379,9377,9375,9373"]