Qırım Müftisiniñ muavini Esadullah Bairov “Rusiye musulmanlarınıñ ananeviy-maneviy mirasnıñ ğayrıdan tiklenilüvi: dünya globalleşüvinde musulman özgünliginiñ saqlanıluvı” konferentsiyasında iştirak etti. Forumda Dağıstan başı vazifelerini vaqıtınca icra etken Vladimir Vasilyev, Cumhuriyetniñ Müftisi şeyh Ahmad Afandi, Rusiye musulmanları şurasınıñ başı Albir Krganov, Rusiye, MDB ve Saudiya Arabistandan kelgen diger ruhaniyler iştirak etti. Konferentsiya çerçivesinde iştirakçiler musulman dünyasındaki vaziyetni ve tış faktorlarnıñ Rusiyedeki iç siyasetine tesirini muzakere ettiler. Bundan da ğayrı, islâmnıñ 2030 senesine qadar inkişaf planınıñ meydanğa ketirilmesine büyük diqqat ayırıldı. Böyle teklifni Rusiye musulmanları şurasınıñ başı Albir Krganov seslendirdi. O qoştı ki, ruhaniylerniñ eñ büyük vazifelerinden biri yüksek seviyeli imamlarnıñ terbiyelenüvdir.
Konferentsiya yedi qısımğa bölündi. Esadullah Bairov “Globalleşüvniñ halqara ve milletara hususiyetleri” bölüginde iştirak etti. O qayd etti ki, globalleşüvniñ em müsbet, em de menfiy tarafları bar. Olarnı ise din ve milletlerara suallerniñ çezilmesi içün qullanmaq kerektir.
“Globalleşüv – farqlı din ve millet vekilleriniñ bir arada inkişaf yolunda çalışmasıdır. Bunıñ em müsbet, em de menfiy tarafları bar, çünki bazı milletler özgünligini coyıp qala”, – dep ayttı Esadullah Bairov.
Bairovnıñ fikirine köre, şimdiki globalleşüvniñ menfiy tarafı şu ki, zemaneviyleşken sayın insanlar dinni unutalar.
“Dinden uzaqlaşqan sayın cemiyet tarihı, medeniyetini de unuta. O yañı ruhiy menbaalarnı qıdırmağa başlay. Onıñ içün bizim ananeviy tamırlarımıznı saqlap qalmaq ve olarnı köz ögüne alıp, diger din ve millet vekillerinen adım atmaq pek müim”, – dep qayd etti Bairov.
Konferentsiya neticesinde iştirakiler Rusiye musulmanlarına muracaat etti. Muracaatta bugün Allah yolunda ketip, öz milleti, an-anelerini, menligini, musulman özgünligini saqlamağa büyük bir iştir. Bizge ilmiy-tehnikiy globalizatsiya degil de, ateizm, ahlâq bozuqlığı globalleşüvi aşlana. Böylece, qorantalar bozula. Bu kibi zararlı leyhanıñ başında özgünlik, medeniyet ve milletlerni yoq etken bir maqsad tura. Bizim vetanımız ise milletler ve olarnıñ tarihıne büyük emiyet bere. Biz, musulmanlar, Vetanımıznıñ oğulları olaraq ecdatlarımıznıñ hatırasını ürmet etip, an-anelerimiz ve birligimizni coymamaq kerekmiz. Biz milletimizniñ taqdirinde iştirak etip, onı kelecek nesillerge qaldırmalımız.
QMDİ MDT matbuat hızmeti
