Qırım Cumhuriyeti ve Sevastopol şeeri musulmanları diniy idaresiniñ konferentsiya salonında Müfti muavini Raim Ğafarovnıñ Rusiye köy hocalığına nezaret idaresiniñ Cenübiy bölgelerara idaresi içki baytarlıq nezareti bölügi reisiniñ muavini Svetlana Şambazova ile iş körüşüvi olıp keçti. Toplaşuv esnasında Qurban bayramı arefesinde aktual olğan ayvanlarnıñ qurban etilmesi vaqıtında sanitar-baytarlıq talaplarına riayet etilüvi meselesi muzakere etildi. “Bizim içün ayvanlarnı bütün diniy talaplarğa uyıp, ve, aynı vaqıtta, etrafqa zarar ketirmeyip çalmaq ğayet müimdir”, – dep, qayd etti Raim Ğafarov.
Svetlana Şambazova ise, belgiledi ki, diniy idareler ve nezaret organları bir-birinen işbirlikte olmalı. Bundan da ğayrı, Svetlana Şambazova baytarlıq qanunlarına riayet etilüviniñ kerekligi aqqında tarif etti.
QMDİ matbuat merkezi
Baytarlıq qanunlarına riayet etüvniñ kerekligi aqqında HATIRANAME
– tiri ayvanlarnıñ yanında baytarlıq vesiqaları olması zarur;
– ayvanlarnı Rusiye Federatsiyasınıñ diger subyektlerinden ketirmek içün Rosselhoznadzornıñ (Rusiye köy hocalığına nezaret idaresiniñ) yerli idarelerinden ruhset almak kerek;
– ayvanlarnıñ soyuluvı soyuluv noqtalarında ve saalarında 12.03.2014 tarihlı № 72 Rusiye köy hocalığı nazirliginiñ emirinen belgilengen Ayvanlarnı soyuv ve et ile sanaiy vasfı olmağan diger soyuv mahsulatlarnen alâqalı baytarlıq qaidelerine esasen becerilmeli;
– ayvan soyulması neticesinde elde etilgen mahsulat baytarlıq-sanitar ekspertizadan keçmeli;
– biologik qalımtılarnı (ayvanlarnıñ ve quşlarnıñ leşlerini, tüşürilgen ya da ölü doğğan yavrularnı, baytarlıq konfiskatlarnı, insanlarnıñ ve ayvanlarnıñ ğıdalanması içün kelişmegen diger qalımtılarnı) topraqqa kommege, çöplük obalarına, çöplük konteynerlerine, çölge, ormanğa, derege ya da suv obyektlerine taşlamağa yasaqtır;
– biologik qalımtılar Rusiye Federatsiyası köy hocalığı nazirliginiñ 2020 sene, oktâbr 26 tarihlı № 626 emirinen kirsetilgen Biologik qalımtılarnı toplav, yañıdan işlev ve yoq etüv baytarlıq-sanitar qaidelerine uyğun olaraq yaqılaraq yoq etilir. Bu emirge esasen, em de, biologik qalımtılarınıñ yoq etilmesi içün sahiplerniñ mesülietindedir.
Mezkür talaplarnıñ bozuluvı RF Memuriy qanun bozuluvı kodeksiniñ 10.8, 10.6 maddeleri boyunca cezalandırılacaq.
Şu qaidelerge riayet etilmemesi vaziyetinde insanlar ve ayvanlar içün umumiy olğan havflı yuqucı hastalıqlarınıñ tarqalmasına yol açıla bile, em de iqtisadiy ziyanğa oğramaq mümkün.