Qırımtatar medeniy tarihiy miras müzeyinde Qırım halqlarınıñ sürgünlik qurbanları hatırası kününe bağışlan “Evge ketirgen uzaq yol” sergisiniñ açılışı olıp keçti. Sergide ressam Sadıh Aci-Selimovnıñ sürgünlik devirinde ve Qırımğa avdet olğan soñ yapılğan işleri numayış etildi. Öz işlerinde müellif balalığından esinde qalğan 1944 senesi, mayıs 18 künü Üsküt köyü (Privetnoye, Aluşta rayonı) sakinleriniñ sürgün etilmesi aqqında hatıralarını primitivizm üslübinen aks etti. Tedbirde Qırım Cumhuriyeti ve Sevastopol şeeri Müftisiniñ muavini Raim Ğafarov uzun ğurbetlik yolunda can bergen semetdeşlerimizniñ ruhuna dua oqudı.
Musafirler ögünde müzey müdiresi Safiye Eminova, Medeniyet nazirliginiñ müzey, kitaphane işi ve medeniyet saasında tahsil idaresiniñ başlığı Sergey Patruşev, Aqmescit şeer memuriyetiniñ milletlerara munasebetler boyunca bölükniñ başlığı Arsen Qurtveliyev, qırımtatar milliy areketiniñ veteranı Emir Mecitov, ressam Sadıh Acıselimovnıñ qızı Mümine Murahas çıqışta bulundılar. Tedbir esnasında Aqmescit şeeriniñ № 42 orta mektebiniñ talebeleri Sadıh Acıselimovnıñ sürgünlikke bağışlanğan şiirlerini oqudılar. Yaşlı közler ve büyük eyecannen öz şiirini Qırım Cumhuriyetinde nam qazanğan artist, halq yırlarınıñ bilgiri ve icracısı Rustem Memetov oqudı.
Qırım MDİ matbuat hızmeti