Qırım musulmanları diniy idaresiniñ “Faydalı ilim” maarif-oqutuv merkezinde mubarek “Üç aylarnıñ” başlanuvına bağışlanğan tedbir olıp keçti. Teşkilâtçılarnıñ sözlerine köre, tedbirniñ esas ğayesi – “Bütün musulmanlar ağa-qardaştır”.
“Bu – dostluq, qarşılıqlı ürmet, yardımlaşuv, digerğamlıq bayramıdır. “Yañı baar” leyhası çerçivesinde keçirilgen tögereklerge farqlı milletlerden balalar kele, amma episini inanç ve sevgi birleştire”, –añlatalar teşkilâtçılar.
Tedbir programması boyunca balalar mubarek “Üç aylar” ve dostluq aqqında şiirler oqudılar, tapmacalarnıñ cevaplarını tapmağa tırıştılar, ana-babalarınen beraber farqlı yarışlarda iştirak ettiler. Kiçkeneler ana tilde temaşa kösterdiler qırımtatar milliy “haytarma” oyunını icra ettiler, ve qırımtatar, rus, ukrain ve arap milliy urbalarını numayış ettiler. Bundan da ğayrı, tantanalı tedbir çerçivesinde “Bitamnıñ qoqlası” yarışınıñ ğalipleri taqdirlendi.
Tedbir balalarnıñ ana-babaları azırlağan “Qardaşlıq sofrası” milliy yemekler sofrasınıñ qurulmasınen yekünlendi.
QMDİ matbuat hızmeti
