Qarasuvbazarnıñ merkeziy camisinde “Cenaze merasimi” mevzusında seminar ötkerildi. Ameliy seminarnı Qırım ve Sevastopol şeeri müsulmanları Diniy İdaresiniñ temsilcileri Raim Ğafarov ve Ridvan Maqsudov keçirdiler. Raim Ğafarov Qırım Müftisi hacı Emirali Ablayev adından iştirakçilerni selâmlap, bu kibi seminarlar diniy bilgilerniñ arttırılması içün ğayet kerekli olğanını qayd etti.
“Çoq yazıq ki, bazıda merhumnıñ yaqınları ne yapacağını, kimge muracaat etecegini bilmeyler. Biz bu kibi lektsiyalarnıñ yardımınen bilgilerni insanlarğa yetkizdirmege tırışamız”, – dep ayttı Raim Ğafarov.
Seminarda 50 insan iştirak etti, olarnıñ arasında em qadınlar, em de erkekler bar edi. Ameliy seminarnıñ ketişatında Ridvan Maqsudov İslâm boyunca cenaze nasıl keçkenini kösterdi. Hususan, mevtanıñ nasıl yuvulğanı, kefinlikke qoyulğanı, bu vaqıtta oqulğan dualar, merhumnıñ tuvğanları, cenazege kelgen cemaat ne yapmaq kerekligini añlattı. Bundan da ğayrı, ocalar mezarlıqta defn etilme qaideleri, insanlar kendisini nasıl alıp barmaq kerekligini añlattı.
“Ögretüv seminarları ve lektsiyalarnı bütün Qırım boyunca keçiremiz. Yaqın zamanda kene de Qarasuvbazarnı ziyaret etip, “Nikâh merasimi” mevzusında lektsiyanı keçirmege planlaştıramız”, – dep ayttı Raim Ğafarov
QMDİ MDT hızmeti
-
- Jpeg
-
- Jpeg
-
- Jpeg
-
- Jpeg
-
- Jpeg
-
- Jpeg
