Saq şeerinde “Yañı cami” camisi yanında oğlanlar içün yazlıq lageri açıldı. Saq şeeriniñ imamı Mesfer Settarovnıñ sözlerine köre, eki aftalıq lagerniñ programmasında İslâm temelleri, Quran oquvı, Muhammed Peyğamberniñ (s.a.s.) ayatını ögrenüv dersleri mevcut, bundan da ğayrı, sport yarışları, inkişaf ettirici oyunlar, kvestler ve viktorinalar olacaq. Ekskursiyalar ve intellektual piknikniñ keçirilüvi de közde tutula.
“Er sabanı biz gimnastikadan başlaymız, bundan soñ balalar ocalarnen ders yapalar. Balalarğa meraqlı olsun dep, biz sport ve icat sektsiyalarnı da kirsettik. Bundan da ğayrı, biz camide beraber cemaat namazını qılamız. Sport, icat, diniy bilgiler – bular sayesinde ösmür içün yaz meraqlı ve faydalı keçe”, – dedi Mesfer Settarov.
Oğlanlar içün lager eki afta devam etecek, bundan soñ ise, qızlar içün lager başlaycaq.
Qırım MDİ matbuat hızmeti
