Aqmescit şeeriniñ memuriyeti Qırım Cumhuriyeti ve Sevastopol şeeri musulmanları diniy idaresi tarafından keçirilgen “Merhametlik lâlesi” aktsiyasına qol tuttı.
Hayriye aktsiyası Aqmescit şeer memuriyetiniñ binasında olıp keçti. Tedbirde Qırım Müftisiniñ muavini Raim Ğafarov iştirak etti. O, aktsiya aqqında ve İslâm dininde hayriyeniñ esas degerlerden biri olğanı aqqında tarif etti.
Qırım Cumhuriyeti ve Sevastopol şeeri musulmanları diniy idaresi Aqmescit rayon memuriyetiniñ başlığı Dionis Aleksanovğa ve onıñ muavini, Ruslan Yakubovğa hayriye aktsiyasına destek köstergenleri ve şu aktsiyada şahsen iştirak etkenleri içün minnetdarlıq bildire.
Hatırlatamız, Qırım Cumhuriyeti ve Sevastopol şeeri musulmanları diniy idaresi “Merhametlik lâlesi” aktsiyasını keçire. “Balalarnıñ ellerinen ve büyüklerniñ eyi niyetinen yapılğan merhametlik” şiarı astında aktsiya 2020 senesiniñ dekabr 26 kününe qadar keçirilecek. Aktsiyada iştirak etmek içün Aqmescit şeer mektepleriniñ talebeleri davetlidir. Olarnıñ ellerinen yapılğan aktsiyanıñ timsali olğan lâleler satılıp, hayriye içün qullanılacaq. Toplanğan paralar paalı tedaviylevge muhtac balalarnıñ qorantalarına teslim etilecek.
QMDİ matbuat hızmeti
