Râzan şeerinde (Rusiye) “Halqara migratsiyanıñ zemaneviy tendentsiyaları ve onıñ Rusiyeniñ medeniy ve içtimaiy tınçlıqqa tesiri” mevzusında tögerek masa ötkerildi. Tögerek masanıñ işinde Râzan vilâyeti nazirlikleriniñ vekilleri, Râzan şeeriniñ memuriyeti, din erbapları, milliy diasporalar ve ticariy olmağan teşkilâtlarnıñ temsilcileri, Rusiye Federal ceza icra etüv hızmetine ait (FSİN) Uquq ve idarecilik akademiyası ruhiyat fakültetiniñ kursantları iştirak ettiler.
Toplaşuvnı Râzan vilâyetiniñ imam-muhtasibi Raşid hazrat Bultaçeyev alıp bardı.
QMDİ-niñ “Faydalı ilim” bütünqırım leyhasınıñ reberi Zeyneb Bairova “Ruhiyatıçınıñ şahsiy praktikasında migrantlar ile çalışuvda esas meseleler” serlevalı maruzasınen çıqışta bulundı.
Maruzasında ilâhiyatçı ve ruhiyatçı olğan Zeyneb Bairova migrantlarnen çalışqanı zaman ruhiyatçınıñ rastkelgeni bir qaç mevzunı qayd etti. Hususan, alışqan müiten uzaq yaşağanları, yañğızlıq, mentalitetlerniñ farqlılığı ve saylav añlaşılmamazlığı aqqında tarif etti.
“Misal olaraq, insan mında başqa bir regiondan, onıñ fikirine köre, vaqıtınca, kelgende, bir çoq allarda bu evliliknen neticelene, böyle vaziyette insanlar ömür arqadaşlarınıñ saylağanlarını qabul etmemezlikleri problemasına rastkeleler. Medeniyetlerara munaqaşa – insanlarnıñ ruhiyatçılarğa muracaat etkeniniñ esas sebebidir, ve biz oña neni istegenini, nasıl yaşamaq kerek olğanını, bu munaqaşanı nasıl aşmaq ve yañı qorantanıñ yañı şaraitine nasıl alışmaq kerekligini añlatıp, olarğa yardımcı olmalımız”, – dep ayttı Zeyneb Bairova. Onıñ sözlerine köre, migrantlarnıñ ruhiy problemaları sırasında “analarnıñ ruhiy ceetten yanıp bitmesi” degen mesele de sıq rastkele. Bu problema alışqan müitten uzaq yaşağan, tuvğanlarınıñ desteginden marum qalğan qadınlarda peyda ola, çünki yaşağan memleketinde ömür arqadaşından ğayrı onıñ bir kimsesi yoq. Böyle qadınlar balalarnıñ terbiyesinde de çoq qıyınlıqlarğa oğray.
“Buña daa soñrağa qaldırılğan ömür sindromını qoşuñız. Migrant onıñ içün yat bir ülkede, onıñ fikirince, vaqıtınca, yaşay, ve o, er şeyni kelecekke qaldıra, şimdiki yaşayını ise, qaralama olaraq qabul ete”, – qayd etti ruhiyatçı.
Bundan da ğayrı, Zeyneb Bairova Musulmanlarğa ruhiy destek birleşmesiniñ Qırım regional temsilciligi böyle vaziyetlerge tüşken insanlarğa faal destek köstergenini añlattı.
Tögerek masa “Râzan vilâyetiniñ İslâm medeniy Merkezi” Muhtar ticariy olmağan teşkilât ve Râzan vilâyetiniñ musulmanları diniy idaresi Merkezleştirilgen diniy teşkilâtı tarafından “Al-Vasatıya – ümerennost” teşkilâtı, “Aişa” halqara qadınlar klubı ve Râzan vilâyetiniñ yerler ve informatsion siyaseti nazirliginiñ destegi ile teşkil etildi.
QMDİ matbuat hızmeti
