Qırım Cumhuriyeti ve Sevastopol şeeri musulmanları diniy idaresiniñ temsilciler eyeti Moskvada Qırım Cumhuriyetiniñ ve Sevastopol şeeriniñ Rusiye terkibine kirgeniniñ 7-yıllığına bağışlanğan tedbirlerde iştirak ete.
Bölgelerara işbirlik programmasınıñ ömürge keçirilmesi çerçivesinde Moskva şeeriniñ akimiyeti mart 18-21 künleri paytahtta, ananeviy olaraq, Qırım künlerini keçire. Şeerde Qırımnıñ yaşayışı ve tarihına bağışlanğan farqlı sergiler açıldı, “Lujniki” sport külliyesinde bayram kontserti olıp keçti.
Üç kün devamında Moskvanıñ farqlı köşelerinde turistik şaleler çalışacaq, anda tatilde raatlanmaq içün musafirhane ya da sanatoriyni saylap almaq, Qırımdaki esas turistik marşrutlar aqqında bilgi elde etmek ve yarımadanıñ ziyaret etilecek yerlerinen tanış etken sergini körmek mümkündir. Bundan da ğayrı, mart 31 kününe qadar Tver bulvarında “Bugünki Qırım” fotosergisi keçirilecek. Mart 18 ile aprel 18 künleri arasında “Zarâdye” parkında “Qırım. Tarih” sergi leyhası çalışacaq.
Qırım MDİ matbuat hızmeti