Moskvada keçken “Müsulman qadınınıñ cemiyetteki içtimaiy yeri” VI Bütünrusiye qadınlar teşkilâtlarınıñ Qurultayında Qırım ve Sevastopol şeeri müsulmanları Diniy İdaresiniñ “Faydalı ilim” maarif leyhası eñ güzel leyha olaraq tanıldı. Qurultay çerçivesinde QMDİ qadınlar bölüginiñ temsilcileri “2018 s. eñ güzel müsulman qadınlar teşkilâtı” Kubogı ile taqdirlendi. Forumda Rusiyeniñ 34 regionından kelgen vekiller iştirak etti. Qırım Cümhuriyetini ilâhiyatçı-ruhiyatçı Zeyneb Bairova, İslâm dini temelleri ocası Lilâ Seitmemetova ve Qırım müsulman bloggeri Niyara Nagayeva temsil ettiler.
Zeyneb Bairovanıñ sözlerine köre, Qurultaynıñ aktualligi şunda ki, bugün müsulman qadınları cemiyette faal rol oynay, içtimaiy leyhalarnı ömürge keçire, hayriye işlerinde iştirak ete, devletniñ siyasiy ayatında faal yerni alalar. Bu kibi faaliyetniñ esas maqsadı – icat, etraftakilerniñ ayatını eyileştirmek, ruhiy ve içtimaiy meselelerni çezmek, imayesiz qalğan eali tabaqalarına yardım köstermektir.
Zeyneb Bairova: “Cemiyette imanlı qadın içtimaiy ceetten faal olamağanı aqqında fikir bar. Bütünrusiye qadınlar teşkilâtlarınıñ Qurultayı ise müsulman qadınınıñ cemiyetteki rolü, onıñ, devlet taqdirindeki yeri, müsulman qadınları teşkilâtlarınıñ işbirligi ve diniy cailliknen küreş aqqında muzakerelerniñ güzel meydanıdır”, – dep qayd etti.
Bütünrusiye müsulman qadınları teşkilâtları Qurultayınıñ programması çerçivesinde “Müsulman qadınınıñ cemiyetteki içtimaiy yeri” mevzusında ilmiy-ameliy konferentsiya, farqlı mevzularda tögerek masalar keçirildi. Hususan “Müsulman qadınınıñ içtimaiy faaliyeti ve devletniñ inkişafına qoşqan issesi”, “Musulman qadını ve onıñ siyasiy faaliyeti”, “Rusiye migrantları: cemaat teşkilâtlarınıñ rolü” kibi mevzular muzakere etildi. “Tögerek masalarda” iştirak etmek içün siyasiy ve içtimaiy faaliyetçiler, bundan da ğayrı, Rusiyede migrantlarnıñ işlerinen oğraşqan mütehassıslar davet etildi.
Qurultaynıñ soñki künü “Bloglar – Rusiye içün içtimaiy faydalı ve vetanperverlik iştir” mevzusında konferentsiya keçirildi. Mında muvafaqiyetli müsulman bloggerleri, PR saasınıñ mütehassısları, müsulman cemaat teşkilâtlarınıñ reberleri ve faaliyetçileri iştirak etti. Konferentsiyanıñ maqsadı – müsulman yaşlarına içtimaiy ağlarnıñ tesirini ögrenmek, içtimaiy ağlarnıñ vastası ile cemiyetke fayda ketirecek işlerni tedqiq etmektir. Konfrentsiyanıñ esas maqsadlarından biri – individual bloglarnıñ vastası ve islâm cemaat teşkilâtlarınıñ yardımı ile pozitiv müsulman şahsiyetini taqdim etmektir.
QMDİ matbuat hızmeti
