Mubarek Ramazan ayınıñ ilk künlerinden başlap, Qırım camilerinde toplu iftarlar ötkerile. Bu sene iftar aqşamları ayrı bir müitte keçirildi, çünki koronavirusnen bağlı sıñırlavlar sebebinden musulmanlar eki yıl devamında cemaatnen beraber toplanıp, iftarlar keçirip olamadılar. Aqmescit şeeriniñ Borçoqraq (Fontanı) qasabasınıñ imamı Löman Vefayevniñ sözlerine köre, soñuna keleyatqan Ramazan ayınıñ şu künlerinde toplu iftarlarda bayram müiti üküm sürmekte. “Biz endi Oraza bayramına azırlanamız. Batutlar sımarlandı, balalar içün tatlı bahşışlar alındı. Böyle hoş azırlıqlar insanlarnı birleştire. Çoq şükür, böyle bahtlı künlerni körmege Allah bizge nasip etti”, – dedi Löman Vefayev.
Hatırlatamız, mayıs 1-nde soñki oraza künü, mayıs 2-sinde – Oraza bayramınıñ birinci künüdir. Qırımnıñ bütün camilerinde bayram namazı mayıs 2-de, saat 6:10 başlanacaq.
Qırım MDİ matbuat hızmeti