Pâtigorsk şeerinde, Pâtigorsk Devlet universitetinde “Qırımda devlet ve diniy teşkilâtlarnıñ inkişafı boyunca aktual sualler ve Rusiye Federatsiyasınıñ diger regionları ile işbirlik” konferentsiyası ötkerildi. Konferentsiyada Qırım müsulmanları Diniy İdaresiniñ temsilcileri iştirak etti. Bundan ğayrı, tedbirde Qırım aliy oquv yurtlarınıñ temsilcileri de qoşuldı: Qırım Federal universiteti, Qırım müendislik ve pedagogika universiteti, Qırım medeniyet, turizm ve sanat universitetiniñ azalarıdır.
Konferentsiya çerçivesinde iştirakçiler ögünde Şimaliy Kavkaz federal bölgesinde Rusiye Prezidentiniñ mesülietli temsilcisi Öleg Belaventsev çıqışta bulundı.
Öleg Belaventsev maruzasında Kavkaz, Rusiyeniñ eñ çoq çeşit millet yaşağan region olğanını qayd etti. Mında, Qırımda olğanı kibi, farqlı din vekilleri, şu cümleden, hristianlar, müsulmanlar ve yehudiyler yaşamaqta.
“Biñ yıllar devamında yan-yanaşa yaşamaları – tek biri-birine nisbeten ürmet degil de, farqlı din, millet vekilleriniñ hayır işler etrafında birleşmesini temsil ete”, – dep qayd etti Öleg Belaventsev.
Mesülietli temsilci öz çıqışında medeniy dünya ögünde turğan bir sıra suallerni qayd etti. Birinci sırada ekstremizm ve terrorizm meseleleridir. Onıñ bildirgenine köre, terroristler birleşmeleri diniy printsiplerge sadıqlığını ilân etseler de, olarnıñ din ile iç bir alâqası yoq. Belaventsev qayd etti ki, bu saada diniy liderlerniñ büyük mesülieti bar.
“Ekstremizm ve terrorizmniñ destruktiv mefküresini insanlarnıñ aqıllarında yoq etmek – eñ qıyın iştir. Bu meselede diniy başlıqlarnıñ mesülieti ğayet büyüktir. Bu kibi suallerni çezgende, diniy liderler, aqsaqallar, büyük ömür tecribesi olğan adamlarğa muracaat etmeli, çünki olar Rusiyeniñ cenübinde din ve milletlerara vaziyetiniñ güzelleşmesi içün yahşı tevsilerni bere bileler”, – dep qayd etti Belaventsev.
Bundan da ğayrı, o qayd etti ki, ekstremistik teşkilâtlar peyda olğanınıñ birinci sebebi – diniy cailliktir.
“Bu kibi ekstremistik teşkilâtlarnıñ tesirine birinci olaraq diniy bilgileri ve terbiyesi olmağan yaşlar tüşeler. Bizim esas maqsadımız – keyfiyetli tasil körgen ve aqıllı nesil terbiye etmektir. Rusiyede din saasındaki yüksek seviyeli erbaplarnı azırlamaq içün maliye, uquq ve usuliy temel meydanğa ketirildi. O, yahşı çalışmalı”, – dep ayttı Belaventsev.
Mesülietli temsilci çıqışında Qırımnıñ başı, diniy başlıqları, hususan, Qırım müsulmanlarınıñ Müftisi hacı Emirali Ablayevge, Qırımda barışıqnı saqlağanları ve tıştan kelgen provokatsiyalarğa yol bermeyip, cenk başlanmasına qarşılıq köstergenleri içün teşekkürler bildirdi.
QMDİ MDT hızmeti
