Qırım Cumhuriyeti ve Sevastopol şeeri musulmanları diniy idaresi erkânında çalışqan “Alem-i Nisvan” islâmiy medeniy maarif merkezinde qadın-qızlar ve balalar arasında bütün Qırım Quran yarışı olıp keçti. Musabaqada 30-dan ziyade iştirakçi yarıştı ve olar 3 yaş kategoriyasına bölüngen edi. QMDİ ocaları Safiye Qurtdede, Hayrunnisa Yağlıyeva, Zera Habipova yarışnıñ jüri azaları olıp, doğru oqunışqa ve telâffuzğa, eda güzelligine qıymet kestiler.
Qırım Müftisi adından yarış iştirakçilerini idaremizniñ diniy tedbirlerni teşkil etüv bölüginiñ rehberi Zenife Ablayeva selâmladı.
“Müftiniñ avalesi ile, Qırımnıñ er bir rayonında, camiler yanında Quran oquvı kursları keçirile. Gruppalar er zaman tolu ola. Dinini bilmek istegen insanlarnıñ sayısı ep artqanı bizni çoq quvandıra. Qırım Müftiligi yarımadanıñ er bir köşesinde musulmanlarda dinini doğru menbalardan ögrenmek imkânı olması içün qolundan kelgenini yapa. Er istegen kişiniñ bilgilerini numayış etmege çaresi olsun ve ileride dinini ögrenmege bir siltem olsun diye merkezimizde böyle yarışlar sıq keçirilecek”, – dedi Zenife Ablayeva.
Er bir yaş kategoriyasında üç ğalip olacağı qararlaştırılğan edi. Umumen, doquz insan ğalip çıqtı. Er biri fahriy yarlıq ve qıymetli bahşış ile taqdirlendi.
Bundan da ğayrı, yarış çerçivesinde İslâm temelleri boyunca viktorina keçirildi. İştirakçiler içün İmam Maturidiy adına Qalay İslâmiy ilimler medresesiniñ talebeleri medrese ocası Meryem Mujdabayevanıñ rehberliginde ilâhiyler icra ettiler.
Qırım MDİ matbuat hızmeti