Qalay islâmiy ilimler medresesinde diniy tahsilni almağa istegen talebeler ile mulâqat (sobesedovaniye) keçirildi. Medresege vesiqalarnı 17 yigit ve 11 qız teslim etti.
Ösmürler ile mulâqatnı medrese ocaları keçirdi. Olarğa umumiy ufuq suallerinen ve İslâmnen temelleri boyunca sualler berildi.
Medrese müdiri Edem Lümanovnıñ sözlerine köre, bu sene diniy tahsilni almağa istegen insanlarnıñ sayısı arttı.
“Kiriş kampaniyası çerçivesinde medrese ocaları büyük iş yaptı. Biz cumhuriyetniñ aman-aman bütün bölgelerini ziyaret etip, yerli eali, yaşlar, olarnıñ ana-babaları, yerli diniy teşkilâtlar ve imamlarnen körüştik ve olarnı medreseniñ programmasınen tanış ettik. Bunıñ müsbet neticelerini artıq köremiz”, – dedi Edem Lümanov.
Qalay islâmiy ilimler medresesine kiriş kampaniyası avgust 20 kününe qadar devam etecek. Birinci dersler ise, avgustnıñ 25-nde başlanacaq.
QMDİ matbuat hızmeti
