Canköy rayonında Qalay islâmiy ilimler medresesini gazğa qoştılar. Bir yıl devamında medrese memuriyeti gazifikatsiya leyhasını azırladı, qızdıruv sistemasını qurıp işletmek içün kerekli donatmalarnı aldı.
Qalay medresesiniñ müdiri Edem Lümanovnıñ sözlerine köre, 20 yıl devamında Qalay medresesi kömürnen qızdırıldı, bugünki künde ise, bu pek masraflı ve ekologiya ceetinden zararlıdır.
“Medreseniñ gaznen qızdırıluvı onıñ bücetini iqtisat eter, müessiseniñ hocalıq hızmeti hadimleriniñ işini qolaylaştırır ve etraftaki müitni saqlamağa yardım eter”, – dedi Edem Lümanov.
Al-ı azırda Qalay islâmiy ilimler medresesinde 33 oğlan ve 30 qız tahsillerini ala, bundan da ğayrı, hafızlar medresesinde 27 talebe oquy.
Qırım MDİ matbuat hızmeti
