İslâm ilimleri Qalay medresesinde balalar içün yaz meydançığı açıldı. 7-12 yaşındaki 20 oğlan ve qız 10 kün devamında meydançıqnı ziyaret etecekler. Künlük lagerniñ programmasında areketli oyunlar, ekskursiyalar, meraqlı viktorinalar, İslâm temelleri dersleri ve Quran oquvı. Qırım müsulmanları Diniy İdaresiniñ maarif leyhasınıñ reberi Zeyneb Bairovanıñ sözlerine
köre, programma em Qurannı oqumağa bilgen, em de arap elifbesini bilmegen balalarğa uyğun olur.
“Oğlan ve qızlarnen medrese ocaları çalışacaq, balalar İslâm oquv yurtunıñ oğlan ve qız bölüklerinde bulunacaq. Bizim esas maqsadımız – balalarğa yaz tatillerni faydalı keçirmege yardım etmektir. Ebet, ana-babalar da raatlar, ocalar balalarnı baqacaq”, – dep ayttı Zeyneb Bairova.
Meydançıqnıñ açıluv tedbirinde balalarnı Qırım Müftisiniñ muavini Esadullah Bairov hayırladı ve Müftiniñ adından selâmlar aytıp, vaqıtnı faydanen keçirmege tiledi. Bundan da ğayrı, Qalay medresesiniñ müdiri Emir-Asan Ümerov balalarnı selâmlap, olarğa vaqıtnı coymayıp, bilgi hazinelerini arttırmağa tiledi. Musafirler ögünde “Emanet” studiyasınıñ küçük icracıları çıqışta bulundı. Tedbirniñ soñunda ise balalar içün kâğıt şousı teşkil olundı.
QMDİ matbuat hızmeti
