Qırım Müftisi hacı Emirali Ablayev İmam Maturidiy adına Qalay islâmiy ilimler medresesiniñ gaznen teminlev sistemasınen tanış oldı. Medresege gaz keçirilmesi munasebetnen olıp keçken tantanalı tedbirde Müftinen beraber onıñ muavini Esadullah Bairov, medrese müdiri Edem Lümanov, diniy müessiseniñ ocaları, gaznı keçirgen mütehassıslar ve medreseni gaznen teminlevde yardım etken iş adamları iştirak ettiler.
Medrese müdiri Edem Lümanov qurulğan üç gaz sobasını ve internet yardımınen çalışqan korrektor blokunı kösterip, er kesni sobahanelerge gaz berüv sistemanıñ işleyişinen tanış etti.
Tedbir çerçivesinde Müfti efendi medreseniñ gazlaştırıluvında destek köstergen er kesge, em de medrese hadimlerine teşekkürini bildirdi.
“Biz, Vatanamızda yaşap, er kün, er daqiqa inkişaf aqqında tüşünmek ve oña ıntılmaq kerekmiz. Bizim medresemiz – Rusiyede eñ güzel diniy oquv yurtlarından biridir. Ve biz daa da güzel olmalımız. Bizim mezunlarımız Rusiyeniñ eñ büyük aliy oquv yurtlarında oquşlarını devam ete. İnşallah, Qırımda mıtlaqa öz İslâm institutı açılacaq”, – dedi Müfti efendi.
Gaznen teminlev leyhasını ömürge keçirmege yardım etken iş adamlarına Müfti ve diniy idare adından teşekkürnameler ve hatıralıq ediyeler taqdim etildi.
Qırım MDİ matbuat hızmeti
