Hacı İhsan adına Qalay islâmiy ilimler medresesinde tantanalı mezuniyet bayramı olıp keçti. Oquv programmasını 6 talebe yekünledi, olarnıñ arasında eki qız ve dört oğlan. Olar orta tahsil mektebiniñ ve İslâm dininiñ temelleri dersini alıp barmağa aq bergen medreseniñ diplomlarını teslim aldılar.
Tantanalı merasimde mezunlarnıñ ana-babaları, soy-sopu ve yaqın dostları toplandılar.
Mezunlar ögünde nasiat sözleri ile Qırım Müftisiniñ muavini Ayder İsmailov çıqışta bulundı.
O, tedbir iştirakçilerine Qırım Müftisi hacı Emirali Ablayevniñ tebrik ve selâmını bildirdi, ve mezunlarğa ayat yollarınıñ açıq ve doğru olmasını, özüne, bilgilerine ve Allahnıñ sözüne sadıq olmalarını tiledi.
“Dinimiz – bilgi deryasıdır. Siz er zaman özüñiz içün çoq yañı şeyler açacaqsıñız. Onıñ içün, sizge daa bir kere aytmağa isteyim – iç bir vaqıt oqumaqnı toqtatmañız”, – dedi Ayder İsmailov. Bundan da ğayrı, o, medrese gençlerge doğru yönelişni köstergenini ve endiden soñ bu yoldan ketmek kerekligini qayd etti.
“Elbette, qıyınlıqlar olacaq, nefisnen küreş olacaq, şeytanlar doğru yoldan urmağa çalışacaq, quvançlar, kederler, fuqarelik, yoqsullıq, hastalıqlar ve yañğızlıq ola bile, amma, sizge bir tevsiyem bar – iç bir vaqıt namaznı qaldırmañız. Bu imanımıznı qaviyleştirgen dinimizniñ temelidir”, – dep, qayd etti Ayder İsmailov. Bundan da ğayrı, o, yaşlarğa ecnebiy insanlarnıñ vesveselerine aldanmamağa, fitnege sebep olğan yıqıcı diniy fırqa ve aqımlardan uzaq turmağa çağırdı.
Qırım Müftisiniñ muavini mezunlarnı ocalarğa nisbeten sayğılı olmağa unutmamaq kerekligini bildirdi ve ayrı teşekkürini medreseniñ ocalarına bildirdi. Buña ilâve olaraq, balalarına medrese yardımı ile qaviy diniy temelni bermege tırışqan ana-babalarğa minnetdarlığını ifade etti.
Mezunlarnı diplomlarını alğanınen Qalay islâmiy ilimler medresesiniñ müdiri Edem Lümanov da hayırladı. Onıñ bildirgenine köre, mezunlarnıñ biri oquv yurtunıñ qızlar bölüginde terbiyeci olaraq işini devam etecek, oğlanlar ise, cumhuriyet camilerine imamlar olaraq yollanılacaq.
2020 senesi, iyül ayında Qalay islâmiy ilimler medresesi kiriş kampaniyasını başlay. Yañı 2020-2021 oquv yılında oquv ceryanınıñ islâatı keçirilmesi beklenile, buña esasen, oquv yurtu yañı formatta çalışacaq.
QMDİ matbuat hızmeti
