Qarasuvbazarda XII-XIII asırlarğa ait Üç Azizge bağışlanğan abide açıldı

Qırım Cumhuriyeti ve Sevastopol şeeri musulmanlarınıñ Müftisi
hacı Emirali Ablayev iş ziyareti ile Qarasuvbazar şeerine bardı. Ziyareti
esnasında o, yerli sakinler ve akimiyet vekilleri ile Serebrâkov adına şeer
bağçasında yerleşip, XII-XIII asırlarğa ait Üç azizniñ mezarlığında hatıra
abidesi olaraq qoyulğan baştaşnıñ açılmasında iştirak eterek, yerli din
cemiyetiniñ çoq yıllıq ğayretlerine yekün çekti.
Selâmlav sözünde Qırım Müftisi kelecek nesiller içün diniy abideler
ve medeniy asabalıq saqlavınıñ müimligini qayd etti.
"Bilgenimiz kibi, bu yerde Ümer Devletli, Osman Devletli ve Selvi
Devletli adındaki azizler defn etilgen. Olar öz zamanınıñ ulu erbapları
olıp, Qarasuvbazar şeeriniñ inkişafına, cemiyetniñ maneviy
terbiyesine, musamahanıñ aşılanmasına, milletlerara ve dinlerara
barışıqlıqnıñ pekitilmesine büyük isse qoştılar. Olar qırımtatarlarnıñ
kelecek nesilleri içün nümüne oldılar, defn etilgen yerleri ise,
abadanlaştırılıp saqlanğan. Olar ve ğayretleri aqqındaki hatıralar
nesilden nesilge keçip, künümizgece saqlanılıp kelgen", – dedi hacı
Emirali Ablayev.
Qırım Müftisi şu leyhada iştirak etken metsenatlarğa ve cemaat
faallerine teşekkürnameler taqdim etti ve dua etti. Bundan soñ,
Qarasuvbazar şeeriniñ Refat Veliullah adına Cuma camisinde cemaat
namazı qılındı, namazdan soñ Qırım Müftisi nasiat sözlerinen çıqışta
bulundı ve Qarasuvbazar rayonınıñ imamları ve din cemiyetleriniñ
azalarınen aktual problemalarnı muzakere etti.
Qırım MDİ matbuat hızmeti