Qırım Müftisi haci Emirali Ablayev, Qırım Cumhuriyetiniñ Başı Sergey Aksönovnen, Bağçasaray tarihiy-medeniy ve arheologik qoruq-müzeyinde qazadan qoruv ve tamir-restavratsion işleriniñ ketişatınen bağlı muşaverede iştirak etti.
Qırım Başı: “Qırımtatar halqı Şurasınıñ toplaşuvları çerçivesinde qırımtatar medeniyeti ve urf-adetlerinen bağlı müim obyektlerniñ qurucılığı ve ğayrıdan tiklenilüvi ketişatını muzakere etmege añlaştıq. Bizde bir de bir abideler coyula ve restavratsion işleri qanunğa uymay, kibi fikirler olmasın dep.
Ürmetli Emirali efendi ile añlaşqanımız kibi, er bir meseledeki vaziyet aydın olsun ve Şura azaları bütün ketişatlarda iştirak etsin”, – dep ayttı.
Muşaverede RF Devlet Dumasınıñ deputatı Ruslan Balbek, Milletlerara munasebetler ve sürgün etilgen vatandaşlarnıñ işleri boyunca Devlet komitetiniñ reisi Lenur Abduramanov ve profil nazirlikler ve komitetlerniñ reberleri iştirak etti.
Qırım medeniyet naziri Arina Novoselskaya maruzanen çıqışta bulunıp, Hanlar sarayında keçirilgen işlerniñ esas noqtalarını qayd etti.
Nazirniñ sözlerine köre, Hanlar sarayı, FTSP boyunca rekonstruktsiyadan keçken eñ büyük medeniy miras obyektidir. Onıñ büceti 2 mlrd rub teşkil ete. Restavratsion işlerniñ yekünlenilmesi 2022 senesine qadar planlaştıra.
Sergey Aksönovnıñ fikirine köre, saraydaki rekonstruktsiya işleri yekünlengen soñ, sergi kompozitsiyalarını keñleştirmek kerek.
Cumhuriyet Başı: “Bütün tarihiy artefaktlarnı taqdim etmek kerek. Unikal eşyalar, medeniyet ve edebiyat nümüneleri – bizde kösterilecek şey çoq. Sergi noqtalarını keñleştirmek kerek”, – dep qayd etti.
Qırım Müftisi hacı Emirali Ablayev ise, öz nevbetinde, keçirilgen tedbirniñ müimligini ve obyektte tamir-restavratsion işleriniñ seviyesini qayd etti. Bundan da ğayrı, o, Sergey Aksönovğa, qırımtatar medeniy-tarihiy mirasnıñ saqlanıluvı meselelerinde destek köstergeni içün, teşekkürler bildirdi.
Muşavere çerçivesinde, QC medeniy mirasınıñ saqlanıluvı boyunca Komitet erkânında çalışqan İlmiy-tehnikiy şurasına, Qırımtatar halqı Şurasından eki namzetni kirsetmege qarar alındı.
Bundan da ğayrı, saray damı içün kirametni yapqan şirketniñ işinen tanış olacaq iş taqımı toplanılacaq.
İş ketişatı aqqında vaqtında ve obyektiv malümatnıñ berilüvi içün, mahsus media aks etüv teşkil etilecek.
Qazadan qoruv ve tamir-restavratsion işleri devamında Hanlar sarayı, telükesizlik talaplarını köz ögüne alaraq, turistler içün açıq olacaq. Al-azırda sarayda, 91 qadar turistik gruppalar qabul etile.
Qırım MDİ matbuat hızmeti
(Qırım Cumhuriyeti Başınıñ İnformatsiya İdaresi ve matbuat hızmetiniñ malümatına esaslanıp)
