İyül 26 künü Aqmescitte bu sene hacılıqqa baracaq müsulmanlar içün seminar keçirildi. 300-ge yaqın insan Aqmescitteki Kebir camide toplaştı.
Qırım Müftisiniñ muavini Ayder İsmailov kelgen musafirlerge Qırım Müftisi hacı Emirali Ablayev adından selâmlar aytıp, olarğa hacılıqnı güzel keçirmege tiledi. Ögüt sözlerinde, o, hacılarğa muqaddes Mekke ve Medine topraqlarına barıp, milletimiz ve Vetanımız içün dua etmege unutmamağa çağırdı.
“Bu sene hacılıqqa Qırımnıñ farqlı köşelerinden musulmanlar ketecek. Olarnıñ arasında yaşlar ve qadınlar çoq olğanı ğayet quvandıra. Hacılıqnı yaşlıqta yapmağa tevsiye etile, çünki insan ömür yolunıñ başında imanğa yaqınlaşıp, onı ömür boyu alıp ketse, daa güzeldir”, – dep ayttı Ayder İsmailov.
Qırım ve Sevastopol müsulmanları Diniy İdaresi adından Ayder İsmailov iştirakçilerge ve bu işke öz issesini qoşqan Rusiye tış işler Nazirligi, Rusiye Devlet Dumasınıñ deputatı Ruslan Balbek, Qırım sağlıqsaqlav Nazirligi, Cümhuriyetniñ devlet komiteti, nezaret organları ve, şahsen, Qırım başı Sergey Aksönovqa teşekkürler bildirdi.
Rospotrebnadzor temsilcisi Sergey Tsıganovnıñ aytqanına köre, hacılar mıtlaq şahsiy gigiyena qaidelerine riayet etmek ve yerli yemeklerni aşağanda, çoq diqqatlı olmaq kerekligini qayd etip:
“Qollarnı mıtlaq sabunnen yuvmaq, deve suvu ve qaynamağan suvnı içmemek kerekler, tek şişelerde olğan suvnı içmeliler. Hacılıqtan qaytqan soñ, sağlıqlarına çoq diqqatlı olmalılar, eger problemler peyda olsa, ekimge muracaat etmek kerektir”, – dep ayttı.
Bundan da ğayrı, o, Saudiya Arabistanına kirsetmege yasaq olğan ilâclarnıñ cedvelinen tanış olmağa rica etti.
“İlâclarnı devlet sıñırından alıp ketmek içün poliklinika ya da statsionarda tibbiy malümatnameni almaq kerek”, – dep qayd etti Tsıganov.
Hatırlatamız, bütün Qırım hacıları aşlamadan keçtiler. Hacılarğa yolculıqqa diqqatnen azırlanmağa tevsiye etile: vesiqalarnı teşkermek, devlet ögünde borclarnı ödemek (kredit, para cezası), olarnıñ sayesinde insanğa devletten çıqış yasaq etile bile.
Seminar çerçivesinde QMDİ MDT islâm ilimleri ocaları müsulmanlarnı hacılıqnıñ etapları ve nasıl merasimlerde iştirak etecekleri aqqında haber ettiler. Müsulmanlarğa ameliy tevsiyeler berildi, biñlerce insanlar olacaq yerde neler yapmamaq kerek olğanı añlatıldı.
Qırım hacıları yolğa avgust 3-11 künleri çıqacaq. 2018 senesi Qırım müsulmanları Diniy İdaresiniñ “AVN-TUR” hacılıq operatorı hacılıqqa 600 insannı yollaycaq. Hacılar gruppalarğa bölündi, olarnen beraber yolğa eki ekim çıqacaq. Avgust 28 künü ise hacılar Qırımğa qaytacaqlar.
QMDİ matbuat-hızmeti
