Qırım Cumhuriyeti ve Sevastopol şeeri musulmanları diniy idaresiniñ Hacı İhsan adına Qalay islâmiy ilimler medresesiniñ hafizler bölügi talebesi Yahya İbragimov hafızlığını tamamlap, Quran-ı Kerimni bütünley ezberlegen Qırım hafızlarınıñ sırasına qoşuldı.
Yaş hafiznı tantanalı taqdirlev merasimi Qurman qasabasında yerleşken Qalay medresesiniñ hafızlıq bölüginde olıp keçti.
Yahya İbragimovnı şerefli hafız unvanınen Qırım Müftisiniñ muavinleri Esadullah Bairov ve Ayder İsmailov, Müftiyatnıñ malümat ve neşriyat bölükleriniñ reberi Emir-Asan Ümerov hayırladılar. Merasimde hafızlıq bölüginiñ reberi İlimdar Cambazov, medrese ocaları ve talebeleri, Yahya İbragimovnıñ soyları da iştirak ettiler.
Namazdan soñ, Ayder İsmailov toplanğan er keni selâmlap, Qırım Müftisi hacı Emirali Ablayevniñ hayırlav sözlerini yetkizdi ve Qurannı ezberden ögrenilmesiniñ savabı aqqında tarif etti.
“Cumhuriyetimizde Qurannı ezberden bilgenlerniñ arasına daa bir insannıñ qoşulması – quvançlı bir vaqiadır. Biz Yahyanen ğurur duyamız, ve yetişken bu derecede toqtalmamasını, bilgilerinen paylaşmasını ve etraftakiler içün güzel nümüne olmasını tileymiz. Quranda böyle buyurıla: “bilmegen olsañız, bilgenlerden sorañız”, – dedi Ayder İsmailov.
Yahya İbragimov ise, öz duyğularınen paylaştı. Onıñ sözlerine köre, Qurannı ezberlemek qolay degil edi, amma ecdatlarınıñ arzusını yerine ketirmek istegi oña küç bere edi. Talebe medresede oquşını devam etecek ve ögdeki sene devamında ezberlerini pekitecek.
Merasim devamında talebelerge ediyeler berildi ve bayram sforası quruldı.
Hafiz – Qurannıñ episini ezberlep, onı qorçalağan kimsedir. Peyğamberimiz (s.a.s.) vaqıtından berli musulmanlarda hafızlarnıñ derecesi ve itibarı büyüktir.
QMDİ matbuat hızmeti
