Qırım Cumhuriyeti ve Sevastopol şeeri musulmanları diniy idaresinde Qırım Müftisi hacı Emirali Ablayevniñ bölgelerniñ baş imamlarınen iş körüşüvi olıp keçti. Adet üzre, iş meseleleriniñ muzakeresinden evel seminar olıp keçti. Bu sefer din erbapları İslâmnıñ fıqhiy mektebi olğan hanefiy mezhebi aqqında maruzanı diñlediler.
Soñra imamlar 2021 senesi, fevral 8 künü dünyanı terk etken Aqşeyh rayonı din cemiyetleriniñ reisi İskender Mambetov ruhuna bağışlap, dua keçirdiler.
Toplaşuv esnasında din erbapları Müftinen bölgelerde qısmiy sıñırlavlarnen bağlı vaziyetni muzakere ettiler, bundan da ğayrı, cami topraqlarınıñ resmiyleştirilüvinen bağlı tehnik meseleler de baqıldı.
Mart 10-11 bağlağan gecesine tüşken Mirac gecesine azırlıqlar muzakere etildi, aynı zamanda, imamlarnı Ramazan ayınıñ keçirilüvinen alâqalı meseleler meraqlandırdı.
Qırım Müftisi vaziyetniñ eyileşecegine ümütini bildirdi.
“Ümüt etemiz ki, vaziyet eyileşecek ve Qırım musulmanları Ramazan ayını güzel keçirip, ibadetlerni ve diniy merasimlerni serbest yerine ketirir, şu cümleden, iftarlarğa qoşulır. Ebet, şimdi bu aqta bir şey aytmaq içün daa ertedir, amma, biz ümütimizni coymaymız ve havfsızlıq qaidelerine riayet etmege devam etemiz. Çoq şey bizge, bizim ve etraftakilerniñ sağlığı içün mesülietligimizge bağlıdır”, – dep, qayd etti Müfti efendi.
İş körüşüviniñ soñunda bölgelerniñ baş imamlarına Qırım MDİ “Hidayet” gazetasınıñ yañı sanı darqatıldı, bundan da ğayrı, Qırım Müftisiniñ muavini Raim Ğafarov toplanğanlarğa bütün Qırım müezzinler yarışınıñ başlanuvı aqqında haber etti. Yarış mart ve aprel ayları devamında keçirilecek, ilk basamağı ise, mart 4 künü, Cürçi rayonında ötkerilecek.
Qırım MDİ matbuat hızmeti
