Qırım Müftisi hacı Emirali Ablayev, yanvar 19 künü faniy dünyanı terk etken qırımtatar milliy areket veteranı, Aqyar regionınıñ cemaat erbabı Talât Seydametoviç Suleymanovnıñ qorantasına ve tuvğanlarına teren taziyelerini bildirdi.
“Qırım müsulmanları Diniy İdaresi ve şahsen özümniñ adından Talât Suleymanovnıñ vefat etkeni munasebetinen teren taziyelerimni bildirem. O, Vatanğa qaytuv areketiniñ eñ faal iştirakçilerinden edi. Talât Suleymanov milletniñ kelecegi içün candan qayğırdı. Onıñ adı er bir qırımtatarnıñ yüreginde daima qalacaqtır. Allahtan, merhumğa nisbeten merhametli olmaq ve oña cennet bağçalarını taqdir etmekni tileymiz. Amin. Kerçekten, Allahtan keldik ve Allahqa qaytacamız!”.
Talât Suleymanov 70 yaşında edi.
Allah rahmet eylesin.